تارکین وطن کا مسئلہ شدت اختیار کر چکا ہے۔ جنگ اور غربت کے شکار ممالک سے تعلق رکھنے والے بہت سے افراد مغربی ممالک کا رخ کرتے ہیں۔ اب مغربی ممالک میں بھی تارکین وطن اور مہاجرین کے لیے قوانین سخت ہو چکے ہیں۔ انسانی حقوق کی متعدد نامور تنظیموں نے قوانین میں سختی اور تارکین وطن کی ’’غیرقانونی‘‘ قید کے خلاف بیانات جاری کیے ہیں اور احتجاج بھی کیا ہے۔ کینیڈا کا رخ کرنے والوں میں بہت سے اس ملک میں بس جاتے ہیں لیکن متعدد قید بھی ہو جاتے ہیں۔ اس سلسلے میں یونیورسٹی آف ٹورنٹو سے تعلق رکھنے والی دو محققین پیٹرا مولنار اور سٹیفینی جے سلور مین نے مقید تارکین وطن کے حالات کا جائزہ لیا جسے ذیل میں بیان کیا گیا ہے.
میکسیکو سے تعلق رکھنے والے لوسیا ویگا جیمنیز کی عمر 42 سال، چیک ری پبلک کے جان زمکو کی عمر 31 سال، برونڈی کے ملکیورو گاہنگو کی عمر 64 سال، صومالیہ کے عبدالرحمان کی عمر 39 سال تھی۔ مزید کم از کم 11 افراد ہیں جو جان سے گئے۔ ماہ رواں میں ایک 50 سالہ عورت جس کا نام معلوم نہیں، جان سے گئی۔ وہ اونٹاریو کی جیل میں قید تھی، دوسروں کی طرح اس نے کوئی جرم نہیں کیا تھا، اسے صرف اس کے امیگریشن سٹیٹس کی وجہ سے قید میں ڈالا گیا تھا۔ 2000ء سے اب تک کم از کم 16 افراد کینیڈا کی امیگریشن کے نظام کی خرابیوں کی وجہ سے دوران قید ہلاک ہوئے۔ ان میں وہ چار اموات بھی شامل ہیں جو مارچ 2016ء سے ہوئیں۔![]()
