گوگل پلے اسٹور میں جعلی واٹس ایپ کی موجودگی کا انکشاف

واٹس ایپ دنیا کا مقبول ترین میسنجر ہے مگر کیا آپ کو معلوم ہے کہ گوگل پلے اسٹور پر اس کا ایک جعلی اور ممکنہ طور پر نقصان دہ سافٹ وئیر بھی موجود ہے؟ جی ہاں واقعی، گوگل پلے اسٹور میں اپ ڈیٹ واٹس ایپ میسنجر کے نام سے جعلی ایپ موجود رہی اور کافی عرصے تک کام کرتی رہی۔ یہاں تک کہ اس ڈویلپرز کا نام بھی WhatsApp Inc ہے یعنی وہی نام جو کہ فیس بک کی زیرملکیت اپلیکشن گوگل پلے پر استعمال کرتی ہے۔ بس جو فرق ہے وہ جعلی ایپ کے ڈویلپرز کی جانب سے ایک یونی کوڈ کریکٹر اسپیس کو اپنے نام میں استعمال کرنا ہے۔ تاہم گوگل پلے اسٹور میں سرچ کرنے والے اینڈرائیڈ صارفین کے لیے اسے نظرانداز کر دینا بہت آسان ہے۔

یہ انکشاف ایک سوشل میڈیا سائٹ ریڈیٹ کے صارف نے کیا تھا اور یہ ایپ چیٹ اپلیکشن نہیں بلکہ دیگر ایپس کے لیے اشتہارات ڈاﺅن لوڈ کرنے کا کام کرتی ہے۔ انٹرنیٹ سیکیورٹی کے ماہرین کے مطابق اس ایپ کو کم از کم دس لاکھ سے زائد بار ڈاﺅن لوڈ کیا جا چکا ہے۔ اس جعلی ایپ کے ڈویلپر تو ابھی تک معلوم نہیں ہوسکا کہ کون ہیں مگر جب یہ بات منظرعام پر آئی تو اس ایپ کا نام بدل کر ڈوئل واٹس ویب اپ ڈیٹ کر کے ڈویلپر نام میں واٹس ایپ انک کو ہٹا دیا گیا، جبکہ گوگل پلے سے بھی ریمو کر دیا گیا۔ گوگل کے ایک ترجمان کے مطابق اس ایپ کو گوگل پلے اسٹور سے ہٹا دیا گیا ہے اور ڈویلپر اکاﺅنٹ کو پالیسیوں کی خلاف ورزی پر معطل کر دیا گیا ہے۔ اینڈرائیڈ میں جعلی ایپس نئی چیز نہیں مگر واٹس ایپ کی ڈمی کا استعمال اس بات کی جانب اشارہ کرتا ہے کہ گوگل اس مسئلے کو نوٹس کرنے میں ناکام رہا ہے۔ گوگل پلے اسٹور کے اصولوں کے میں کسی ایپ کی نقل یا لوگو کو چرانے کی اجازت نہیں۔