Anarkali  born Nadira Begum or Sharf-un-Nissa, was a legendary slave girl. It is believed that she was originally from Iran and migrated to Lahore, Punjab (in present day Pakistan) with a trader's caravan.^[1] It is depicted in the Bollywood movie Mughal-e-Azam that during the Mughal period, she was supposedly ordered to be buried alive between two walls by Mughal emperor Akbar for having an illicit relationship with the Crown-Prince Salim, later to become Emperor Jahangir. Due to the lack of evidence and sources, the story of Anarkali is widely accepted to be either false or heavily embellished. The story of Anarkali neither find its mention in Akbarnama nor in Tuzuk-e-Jahangiri. It was first mentioned by an English tourist and trader William Finch in his journal, who visited India on August 24, 1608.^[2][3] The story was originally written by Indian writer Abdul Halim Sharar and on the first page of that book he had clearly mentioned it to be a work of fiction. Nevertheless, her story has been adapted into literature, art and cinema

The Story of Anarkali

Legacy

دنیا میں شائد ہی کوئی ایسا شخص ہو جو کمپیوٹر اور لیپ ٹاپ سے تو آشنا ہو مگر بل گیٹس کو نہ جانتا ہو۔ یہ شخص جس نے مائیکروسوفٹ جیسی بزنس ایمپائر کھڑی کی،مسلسل19سال تک کوئی مائی کا لال دنیا کے امیر ترین شخص کا ٹائٹل اس سے نہ چھین سکا،یہاں تک کہ اس نے اپنی دولت دکھی انسانیت کی فلاح و بہبود کے لئے وقف کر دی۔ بل گیٹس کی زندگی کے بیشمار پہلو ہیں اور یہ فیصلہ کرنا مشکل ہے کہ کس پہلو کو روشن ترین کہاجائے۔لیکن مجھے بل گیٹس کے ذاتی اوصاف سے کوئی سروکار نہیں۔مجھے اس کی شہرہ ء آفاق کمپنی کی کامیابیوں سے بھی کوئی غرض نہیں، جس کی نیٹ ورتھ 69.96ارب ڈالر ہے یعنی پاکستان کے زرمبادلہ کےذخائر سے 11گنا زیادہ۔میں جب بھی بل گیٹس کے بارے میں سوچتا ہوں مجھے بھارتی وزیر اعظم نہرو یاد آتے ہیں۔تقسیم ہند کے بعد ایک مغربی صحافی نے پوچھا ،آپ کے ہاں تو کوئی قابل ذکرپیداوارنہیںجسےبرآمدکر سکیں۔زرمبادلہ کیسے کمائیں گے ۔نہرو نے ہنستے ہوئے کہا ،ہم با صلاحیت افراد ایکسپورٹ کریں گے،یہ افراد ہمارازرمبادلہ ہیں۔آج اس کی یہ بات سچ ثابت ہو رہی ہے اورمیں تب سے رشک اور حسد کے سنگم پر مبہوت کھڑا ہوں جب سے مجھے یہ معلوم ہوا ہے کہ ایک بھارتی نژاد آئی ٹی ایکسپرٹ ستیا نڈیلا کو مائیکروسوفٹ کا نیا سربراہ بنا دیا گیا ہے۔مائیکروسوفٹ کے چیف ایگزیکٹو آفیسر سٹیو بالمر نے مستعفی ہونے کا اعلان کیا تھا اور نئے سی ای او کا انتخاب کرنے کے لئے ایک کمیٹی قائم کی گئی تھی جس میں 100 ماہرین کے نام زیر غور تھے۔نہ صرف اس منصب کے لئے ایک بھارتی شہری کو منتخب کیا گیا ہے بلکہ حیدرآبادکے باسی ستیانڈیلا کے بعد جس شخص کا نام مائیکروسوفٹ کے نئے سربراہ کے طور پر لیا جا رہا تھا اس کا تعلق بھی بھارت سے ہے۔بھارت کی اس سے بڑی کامیابی کیا ہو گی کہ امریکہ کی سب سے بڑی آئی ٹی فرم کے سی ای او کا چنائو تھا اور مسابقت حیدرآباد کے ستیا نڈیلا اور چنائی کے سندر پچھائی کے مابین تھی...وہ لوگ جو امریکہ میں آئی ٹی کے گڑھ سلیکان ویلی کے بارے میں جانتے ہیں ،ان کے لئے یہ خبر ہرگز غیر متوقع نہیں ہے کہ ایک انڈین کو مائیکروسوفٹ کا سربراہ بنا دیا گیا ہے کیونکہ سلیکان ویلی کی تمام آئی ٹی فرموںمیں 80فیصد انجینئروںکا تعلق بھارت سے ہے۔مائیکرو سوفٹ میں ہر تیسرے فرد کا تعلق بھارت سے ہے۔ نہ صرف سلیکان ویلی میں بھارتیوں کی اجارہ داری ہے بلکہ بھارتی اپنی محنت اور لگن کے بل بوتے پر ان آئی ٹی فرموں کو سمندر پار لانے میں کامیاب ہوئے اور اب مائیکروسوفٹ اور یاہو سمیت تمام معروف آئی ٹی فرمیں بھارت میں کام کر رہی ہیں۔ ایک بڑی موبائل فون کمپنی کے پروڈکشن یونٹ انڈیا میں کام کر رہے ہیں۔سلیکان ویلی کے بعد اگر سرمایہ کار آئی ٹی کے حوالے سے کسی اور شہر کا نام لیتے ہیں تو وہ بنگلور ہے۔صرف آئی ٹی ہی کیا بھارتی شہری امریکہ اور یورپ سے لیکر عرب ممالک تک نہ صرف کاروبار کی دنیا کے بے تاج بادشاہ مانے جاتے ہیں بلکہ نچلے درجے کی ملازمتوں سے لیکر اعلیٰ پائے کے انتظامی عہدوں تک ہر طرف اپنی قابلیت کا سکہ منوا چکے ہیں۔تمام ملٹی نیشنل کمپنیوں کے کلیدی عہدوں پر آپ کو ہندو نظر آئیں گے۔پیپسیکو جو ایک عالمی شہرت یافتہ کولامشروب بناتی ہے،اس کے چیئرمین اور چیف ایگزیکٹو آفیسر Indra Nooyiہیں،ماسٹرز کارڈز کے سی ای او Ajay Bangaہیں،امریکہ کے ایک معروف بینک کی سربراہی Anshu Jainکے پاس ہے۔اور معرف بنک کا انتظام ہندوئوں کے ہاتھ میں ہے۔ اگر یہودی لابی کے بعد امریکہ میں کوئی کمیونٹی سب سے زیادہ مضبوط اور بااثر ہے تو وہ بھارتی کمیونٹی ہے۔چند برس قبل فوربز میگزین نے دس ایسی بڑی کمپنیوں کی فہرست جاری کی تھی جن کی سربراہی بھارتی شہریوں کے ہاتھ میں ہے۔کیلی فورنیا،نیویارک،نیو جرسی،ٹیکساس اور فلوریڈا میں 100سے زائد ایسی فرمیںہیں جن میں بھارتی شہریوں کو مالکانہ حقوق حاصل ہیں یا پھر وہ کلیدی انتظامی عہدوں پرہیں۔آپ ان کافر ممالک کو چھوڑیں ۔شائد یہاں پاکستانیوں کو مسلمان ہونے کی وجہ سے تعصب کا سامنا ہو،آپ برطانیہ میں بھی بھارتی شہریوں کی کامیابیاں نظر انداز کر دیں کہ شائد ایسٹ انڈیا کمپنی اور ہندوئوں کا گٹھ جوڑ تاحال قائم ہو۔ آپ دبئی اور شارجہ سے لیکر قطر،عمان،بحرین اور سعودی عرب تک کسی عرب ملک کے اعداد و شمار جمع کر لیں۔آپ ملائیشیا سے انڈونیشا اور ترکی سے مصر تک کسی بھی مسلم ملک میں سروے کرا کے دیکھ لیں ،آپ کو ہندوئوں کی سبقت واضح طور پر محسوس ہوگی۔ اگر کوئی تعمیراتی کمپنی کسی عرب کی ہے تو اس میں انجینئر اور ٹیکنیشن بھارتی ہوں گے ،مزدوروں میں بھی کچھ بنگالی ہوں گے اور کچھ پاکستانی۔اگر کوئی کلینک ہے تو ڈاکٹر ہندو ہو گا،اگر کوئی گروسری سٹور ہے۔کوئی پیٹرول پمپ ہے،کوئی سروس اسٹیشن اور شوروم ہے تو اس کی ملکیت بھارتی شہریوں کے پاس ہو گی اور پاکستانی کسی پیٹرول پمپ پر نوکری کر رہے ہوں گے،کسی ہوٹل میں ویٹر کے فرائض سرانجام دے رہے ہوں گے، کسی سروس اسٹیشن پر گاڑیاں دھو رہے ہوں گے، کہیں ٹیکسی چلا رہے ہوں گے یا کسی تخریب اور فراڈ کی ترکیب سوچ رہے ہوں گے۔

میں رشک اور حسد کے سنگم پر کھڑا سوچ رہا ہوں کہ آخر بھارتیوں کو ایسے کونسے سرخاب کے پر لگے ہیں کہ وہ پوری دنیا میں راج کر رہے ہیں اور ہم ہر جگہ تذلیل و تحقیر کا نشانہ بن رہے ہیں؟آخر ان کے پاس ایسا کونسا ہنر اور ایسی کونسی گیدڑ سنگھی ہے کہ وہ مٹی میں ہاتھ ڈالتے ہیں تو وہ سونا بن جاتی ہے اور ہم سونے پر ہاتھ رکھتے ہیں تو وہ مٹی کے ڈھیر میں تبدیل ہو جاتا ہے؟کیا ایسا نہیں ہو سکتا تھا کہ سلیکان ویلی کی قیادت پاکستانیوں کے ہاتھ ہوتی؟کیا یہ ممکن نہ تھا کی مائیکرو سوفٹ، گوگل، یاہو اور نوکیا کی سرمایہ کاری کے لئے بنگلور کے بجائے لاہور کا انتخاب کیا جاتا؟یہ سوال جس شخص سے بھی کیے جائیں گے وہ اپنی سوجھ بوجھ کے مطابق ان کا جواب دے گا۔ کسی کاخیال ہوگاکہ ہمیں کام چوری کے باعث یہ دن دیکھنا پڑ رہے ہیں،کوئی سوچتا ہو گا کہ ہم بے ایمانی کے باعث رسوا ہو رہے ہیں۔یہ سب باتیں درست ہیں مگر میرا خیال یہ ہے کہ ہم لطیفوں کی وجہ سے ناکام ہیں۔جی ہاں، ہم کامیاب انسانوں کا تمسخر اڑاتے ہیں،لطیفے بُنتے ہیں اور ہر بات ہنسی میں اڑا دیتے ہیں۔یہی وجہ ہے کہ آج ہم خود لطیفہ بن گئے ہیں۔ہم سکھوں کو بیوقوف سمجھتے ہیں،ہر طرح کی حماقتیں ان کے کھاتے میں ڈال دیتے ہیں یا پھر پٹھانوں کا مذاق اُڑاتے ہیں۔ہم ہر اس شخص کا مذاق اُڑاتے ہیں،جو اپنی محنت کے بل بوتے پر کامیابی کی منازل طے کرتا ہے۔نمونے کے طور پر میں ایک لطیفہ نقل کر رہا ہوں۔مجھے نہیں معلوم ،یہ لطیفہ کس کی اختراع ہے مگر آپ کی طرح میں نے بھی یہ لطیفہ کئی بار سنا اور پڑھا ہے۔آپ یہ لطیفہ پڑھیں اور پھر فیصلہ کریں، کیا اس طرح کے لطیفے گھڑنے والی قوم کا کوئی فرد مائیکرو سوفٹ کا سربراہ بن سکتا ہے:ـ’’ایک پٹھان نے مائیکرو سوفٹ کے سربراہ بل گیٹس کو خط لکھا۔کی بورڈ میں ABC کی ترتیب ٹھیک نہیں۔صحیح اے بی سی والا کی بورڈ کب بنائیں گے؟ ونڈوز میں ا سٹارٹ کا بٹن ہے مگر اسٹاپ کا بٹن کیوں نہیں؟جب کی بورڈ میں Any keyکا بٹن نہیں تو پھر کمپیوٹر یہ کیوں کہتا ہے کہ Press any key۔ ہم مس ورڈ(MS Word) تو استعمال کرتے ہیں مگر مسٹر ورڈ کب لانچ ہو گا؟اگر آپ بُرا نا مانیں تو یہ بھی بتا دیں کہ آپ کا نام بل گیٹس ہے تو آپ ونڈوز کیوں بناتے ہیں؟‘‘

محمد بلال غوری
بشکریہ روزنامہ 'جنگ

Microsoft Indian President

حکومت پاکستان اور طالبان کے درمیان مذاکرات میں بہت سی مشکلات ہیں لیکن ان مشکلات کے باوجود اتوار کی صبح اس خاکسار کو ایک اچھی خبر ملی۔ خبر یہ تھی کہ آٹھ فروری کو ہیلی کاپٹر کے ذریعہ پشاور سے میران شاہ پہنچنے والی طالبان کمیٹی کے ارکان کو طالبان کے سینئر رہنمائوں نے یقین دلایا کہ شریعت کے نام پر مذاکرات کو ناکام نہیں ہونے دیا جائے گا۔ طالبان کی کمیٹی کے ارکان پروفیسر ابراہیم خان اور مولانا یوسف شاہ کے ساتھ ملاقات کرنے والے طالبان رہنمائوں میں وہ بھی شامل تھے جن کے بارے میں یہ کہا جارہا تھا کہ وہ پچھلے دنوں میر علی میں ہونے والی بمباری میں مارے گئے تھے۔ طالبان کے سینئر رہنمائوں نے اپنی مذاکراتی ٹیم کے ارکان پر واضح کیا کہ یقیناً نفاذ شریعت ان کا اہم ترین مقصد ہے لیکن مقصد کے حصول کے لئے سازگار ماحول کی ضرورت ہے اور سازگار ماحول امن کے بغیر قائم نہیں ہوگا اس لئے پہلے مرحلے میں ان کی ترجیح قیام امن ہے۔ شمالی وزیرستان میں موجود طالبان کے سینئر رہنما آئین پاکستان کا تفصیلی جائزہ لے چکے ہیں۔ وہ یہ تسلیم کرتے ہیں کہ اس آئین میں اسلامی دفعات موجود ہیں اور اسی لئے مولانا سمیع الحق کے والد مولانا عبدالحق سے لے کر پروفیسر غفور احمد تک اور مولانا غلام غوث ہزاروی سے لے کر مولانا شاہ احمد نورانی تک کئی جید علماء نے1973ء کے آئین پر دستخط کئے تھے لیکن اس آئین پر مکمل عملدرآمد نہیں ہوا اور آئین میں مزید بہتری کی گنجائش بھی موجود ہے، تاہم طالبان اس پیچیدہ معاملے میں فی الحال نہیں الجھنا چاہتے۔ فی الحال ان کی ترجیح جنگ بندی ہے۔جنگ بندی کے ساتھ ساتھ وہ اپنے کچھ قیدیوں کی رہائی بھی چاہتے ہیں اور قیدیوں کی رہائی کے بدلے میں وہ سیکورٹی فورسز کے قیدیوں کو رہا کردیں گے۔ سلمان تاثیر اور یوسف رضا گیلانی کے بیٹوں کے علاوہ پروفیسر اجمل کی بازیابی بھی اہم ہے لیکن ان معاملات پر آگے چل کر بات ہوگی۔

طالبان کا ایک اہم مطالبہ قبائلی علاقوں سے فوج کی واپسی ہوگی لیکن انہیں ایف سی کی موجودگی قبول کرنا ہوگی کیونکہ جنگ بندی کے باوجود جرائم پیشہ اور سازشی عناصر کا راستہ روکنے کے لئے قبائلی علاقوں میں ریاست کی طاقت کو موجود رہنا چاہئے۔ طالبان کا تیسرا اہم مطالبہ یہ ہوگا کہ پچھلے بارہ سال میں جو فوجی آپریشن ہوئے ان میں قبائلی عوام کا جو جانی و مالی نقصان ہوا وہ پورا کیا جائے۔ اس نقصان کا تخمینہ لگانا اور پھر تخمینے کی رقوم کی ادائیگی کا طریقہ کار طے کرنا ایک لمبا عمل ہوگا۔ دوسری طرف حکومتی کمیٹی کی ایک ترجیح یہ ہوگی کہ مذاکرات آئین کے اندر رہ کر کئے جائیں۔ یہاں یہ سوال پیدا ہوتا ہے کہ کیا سنگین نوعیت کے مقدمات میں ملوث ملزمان کی رہائی آئین کے مطابق ہوگی یا نہیں؟ اس سوال کا جواب تلاش کرنے کے لئے حکومت کو آئینی ماہرین کے مشورے کی ضرورت ہوگی لیکن کچھ زمینی حقائق یہ ہیں کہ طالبان اپنے جن قیدیوں کی رہائی چاہتے ہیں ان میں سے اکثر کو عدالتوں میں پیش ہی نہیں کیا گیااور جن کو پیش کیا گیا ان میں سے کئی ایسے ہیں جن کے خلاف ٹھوس ثبوت پیش نہیں کئے جاسکے۔ یہ پہلو نظر انداز نہ کیا جائے کہ قبائلی علاقوں میں پہلا فوجی آپریشن2002ء میں درہ اکاخیل میں ہوا تھا۔ پچھلے 12سال میں 15 سے ز ائد بڑے فوجی آپریشن کئے جاچکے ہیں۔ کسی آپریشن کو’’راہ نجات‘‘ اورکسی آپریشن کو’’راہ راست‘‘ قرار دیا گیا۔ قبائلی علاقوں میں ٹینکوں اور ائیر فورس کے ذریعہ بمباری کا سلسلہ2004 ء سے جاری ہے لیکن امن قائم نہ ہوا۔ یہ بھی درست ہے کہ امن قائم کرنے کے لئے فوج نے2004ء سے 2009ء کے درمیان19 مرتبہ طالبان سے مذاکرات کئے اور 13 مرتبہ امن معاہدے کئے لیکن کئی مرتبہ یہ امن معاہدے طالبان نے توڑ دئیے اور کچھ مرتبہ ایسا بھی ہوا کہ فوج نے طالبان کے رہنمائوں کو گرفتار کرنے یا مارنے کے لئے مذاکرات کا ڈھونگ رچایا۔12سال سے جاری بدامنی کو12 دنوں یا 12 ہفتوں کے مذاکرات میں ختم کرنا بہت مشکل ہے۔ کوئی مانے یا نہ مانے وزیر اعظم نواز شریف واقعی مذاکرات کے ذریعے امن چاہتے ہیں لیکن ماضی میں طالبان کے ساتھ مذاکرات کا کھیل کھیلنے والے اس مرتبہ ایک بڑا آپریشن کرنا چاہتے ہیں۔ دوسری طرف طالبان یہ ثابت کرنا چاہتےہیں کہ ماضی میں فوج کے ساتھ ان کے مذاکرات ناکام ہوئے لیکن سیاسی حکومت کے ساتھ مذاکرات کامیاب ہوسکتے ہیں۔ مذاکرات کامیاب بنانے کے لئے طالبان کو اپنی کارروائیاں بند کرنا ہونگی تاکہ رائے عامہ مذاکرات کی حمایت کرے۔ طالبان کو یہ ماننا ہوگا کہ مذاکرات کے اعلان کے بعد پشاور کے قصہ خوانی بازار میں خود کش حملے نے مذاکرات کو نقصان پہنچایا۔ دوسری طرف جس دن طالبان کی مذاکراتی کمیٹی کو ہیلی کاپٹر میں میران شاہ روانہ ہونا تھا اسی دن متنی اور یونیورسٹی ٹائون کے علاقوں میں طالبان کے دو قیدیوں محمد زیب اور اسد کی لاشیں پھینکی گئیں۔ ان دونوں کو پچھلے ماہ پشاور کے علاقے حیات آباد سے گرفتار کیا گیا تھا۔ ایسا لگتا ہے کہ طالبان کی مرکزی قیادت کو بھی اپنے اندر سے کچھ مزاحمت کا سامنا ہے اور حکومت کے اندر بھی کچھ ادارے وزیر اعظم نواز شریف کے کنٹرول میں نہیں ہیں۔ حکومت تو یہی دعویٰ کریگی کہ سیاسی قیادت اور فوجی قیادت کا نکتہ نظر ایک ہے لیکن کیا کریں کہ لاپتہ افراد کے معاملے پر حکومتی کوشش کے باوجود عدالتی احکامات پر عملدرآمد نہیں ہوتا اور پرویز مشرف کئی ہفتوں سے عدالت میں پیش ہونے کی بجائے ایک فوجی ہسپتال میں پناہ گزین ہیں۔ یہ صورتحال بہت سے سوالات پیدا کررہی ہے اور اہم ترین سوال یہ ہے کہ جو لوگ اور ادارے یہ مطالبہ کرتے ہیں کہ طالبان کے ساتھ مذاکرات آئین کے اندر رہ کر کئے جائیں وہ خود آئین کا اور عدالتوں کا احترام کب شروع کریں گے؟ ایک اور اہم سوال یہ ہے کہ خدا نخواستہ مذاکرات کامیاب نہ ہوئے اور شمالی وزیرستان میں ایک بڑا فوجی آپریشن کیا گیا تو سب جانتے ہیں کہ طالبان کا جواب شمالی وزیرستان میں نہیں آئے گا بلکہ اس مرتبہ وہ اپنا جواب لاہور سے شروع کرکے کراچی تک لے جائیں گے۔ تو کیا پنجاب اور سندھ کو فوج کے حوالے کیا جائے گا؟ مذاکرات کی ناکامی کی صورت میں فوجی آپریشن ہوا تو ہزاروں نہیں لاکھوں لوگ شمالی وزیرستان سے ہجرت پر مجبور ہوجائیں گے۔ کچھ تو خیبر پختونخوا، پنجاب اور کراچی کی طرف جائیں گے لیکن بہت سے افغانستان بھی چلے جائیں جہاں تحریک طالبان پاکستان کے کئی رہنما پہلے سے موجود ہیں۔

2014ء میں امریکی فوج کا افغانستان میں اثر بہت کم رہ جائے گا اور افغان حکومت پاکستان طالبان کے ساتھ مل کر کچھ بھی کرنے میں مکمل طور پر آزاد ہوگی۔ جو لوگ یہ سمجھتے ہیں کہ وہ افغان طالبان کے ذریعہ پاکستانی طالبان کو کنٹرول کرلیں گے وہ احمقوں کی جنت میں رہتے ہیں۔ ہمارا اہم ترین مقصد پاکستان میں قیام امن ہونا چاہئے اور امن کے لئے پرامن مذاکرات کا راستہ بہترین ہے، مذاکرات کامیاب نہیں ہوتے تو پھر جنگ ہوگی لیکن جنگ ہو یا امن حکومت کے سب اداروں میں ہم آہنگی ضروری ہے مجھے یہ ہم آہنگی نظر نہیں آرہی۔

حامد میر
بشکریہ روزنامہ 'جنگ

Pakistan Peace Talks with Taliban by Hamid Mir

وزیر اعظم نواز شریف نے کہا ہے کہ پاکستان سعودی عرب کے تعلقات کو انتہائی اہمیت دیتا ہے، دونوں ممالک نے ہمیشہ مشکل وقت میں ایک دوسرے کا ساتھ دیا ہے۔ ان خیالات کا اظہار انھوں نے جمعہ کو پاکستان کے دورے پر آئے ہوئے سعودی وزیر سیاحت و نوادرات شہزادہ سلطان بن سلمان سے ملاقات کے دوران کیا جنھوں نے گورنمنٹ ہاؤس مری میں ان سے ملاقات کی ۔ شہزادہ سلطان نے صدر مملکت ممنون حسین سے بھی ملاقات کی۔ صدر ممنون حسین نے اس موقع پر سعودی سرمایہ کاروں کوپاکستان میں انفرااسٹرکچر، توانائی، سیاحت و ثقافت سمیت مختلف شعبوں میں سرمایہ کاری کی دعوت دی۔ صدر نے پاکستان کے سیاحتی شعبہ جات و عجائب گھروں اور سعودی کمیشن برائے سیاحت کے درمیان وسیع تر تعاون پر بھی زور دیا اور آزمائش کی ہر گھڑی میں پاکستان کی فراخدلانہ معاونت پر شاہ عبداللہ بن عبدالعزیز اور سعودی حکومت کا شکریہ ادا کیا۔

پاک سعودی تعلقات کا تاریخی تناظر کسی تعارف کا محتاج نہیں، خلیجی اور شرق اوسط کی سیاسی ،تزویراتی اور عسکری امور کے تناظر میں سعودی عرب کا کردار نمایاں اہمیت کا حامل ہے۔ جریدہ ’’اکنامسٹ‘‘اور بی بی سی نے سعودی عرب کے سیاسی، عسکری ، اقتصادی اور سماجی شعبوں میں ترقی و ترویج پر تجزیاتی رپورٹیں شایع کی ہیں جن میں اس کا مشرق وسطیٰ کے صحرائی خطے میں تیل کی دولت سے مالامال عرب و مسلم دنیا میں ایک طاقتور کردار کے طور پر جائزہ لیا گیا ہے ۔ پاکستان کو سعودی عرب سے ایک خاص دینی، سماجی، تاریخی اور روحانی نسبت ہے، اور برس ہا برس سے حرمین شریفین کو اہل پاکستان نے ہمیشہ اپنے دل میں احترام و عقیدت سے جگہ دی ہے، دونوں ملک اپنے لازوال رشتوں اور سیاسی تعلقات کو اہمیت دیتے ہیں، عالمی امور میں جہاں سعودی حکومت نے پاکستانی موقف کی ہمیشہ تائید وحمایت کی وہاں اقتصادی ، تعلیمی اور سماجی شعبے میں بھی پاک سعودی تعلقات ہر دور میں مستحکم رہے چنانچہ سماجی، دینی و روحانی نسبت سے عالمی امور اور دو طرفہ سے اسیروابط آئندہ بھی اسی جذبہ اور دوطرفہ مفاہمت اور اشتراک و تعاون سے جاری رہیں گے۔ وزیر اعظم نواز شریف نے پاکستان میں سیاحت کے فروغ کے بے پناہ مواقع کی موجود گی کا حوالہ دیتے ہوئے کہا کہ پاکستان اور سعودی عرب سیاحت کے شعبے میں ایک دوسرے کے تجربات سے فائدہ اٹھا سکتے ہیں ، انھوں نے سعودی شہزادہ سلطان بن سلمان کو پاکستان بھر کے تفریحی مقامات کے تفصیلی دورے کی دعوت بھی دی ۔ سیاحت وہ اہم شعبہ ہے جس میں سعودی سرمایہ کاری کے بیش بہا امکانات موجود ہیں۔ وزیراعظم اور سعودی شہزادہ برف سے ڈھکے کشمیر پوائنٹ کے خوبصورت نظاروں سے بھی لطف اندوز ہوئے ۔

اس موقع پر سیکیورٹی کے سخت انتظامات کیے گئے تھے۔ پاکستان کے کئی صحرا اور چٹیل میدان پاک سعودی مشترکہ منصوبوں کے ذریعے سرسبز و شاداب علاقوں میں تبدیل ہوسکتے ہیں ۔ قبل ازیں وزیراعظم نواز شریف نے سعودی شہزادہ سلطان بن سلمان بن عبدالعزیز کی والدہ سلطانہ ترکی السدیری کے نام سے منسوب سلطانہ فاؤنڈیشن کے زیر اہتمام ’’ تعلیم وتحقیق اور سماجی ترقی‘‘ کے مرکز کے نئے منصوبے کی افتتاحی تقریب سے خطاب کرتے ہوئے کہا کہ قوم کی ترقی و خوشحالی کے لیے تعلیم کے حصول کو کلیدی کردار حاصل ہے، سائنس و ٹیکنالوجی کے میدان میں ترقی سے اقتصادی خرابیاں دور ہو سکتی ہیں اور ساتھ ہی قوم کی سماجی و اقتصادی ترقی کو یقینی بنایا جا سکتا ہے۔

حقیقت یہ ہے کہ سائنس و ٹیکنالوجی میں مسلم ممالک بہت پیچھے ہیں ، سعودی عرب کی قیادت میں تمام اسلامی ممالک اپنے جدید علمی اور ٹیکنالوجیکل ضروریات کی تکمیل کے لیے وسیع تر اشتراک عمل کی بنیاد رکھ سکتے ہیں۔ وزیراعظم نواز شریف نے تعلیم کے لیے سلطانہ فاؤنڈیشن کی خدمات کو سراہتے ہوئے کہا کہ شہزادہ سلطان بن سلمان کی یہاں موجودگی پاکستان اور سعودی عرب کے عوام کے درمیان پائیدار اور دائمی دوستانہ تعلقات کی واضح علامت ہے ، پاکستان اور سعودی عرب عالمی امن کے لیے اہم کردار ادا کر سکتے ہیں ۔ تعلیم وہ شعبہ ہے جس میں پاکستان اور سعودی ماہرین تعلیم کے فروغ ، فکری پسماندگی ، جہالت کے خاتمہ اور جدید ترین علمی تحقیق کے نئے در کھول سکتے ہیں، شہزادہ ترکی الفیصل پہلے ہی ایک متحدہ اسلامی فورس کے قیام کی ڈاکٹرائن پیش کرچکے ہیں اس پر مسلم ممالک کے تحفظات ہو سکتے ہیں تاہم تعلیمی شعبے میں ایسی کوئی فورس بن جائے تو آئندہ کئی نسلیں مغرب کے تعلیمی تقابل کے قابل ہوسکتی ہیں ۔ پاک سعودی تزویراتی و عسکری تعاون بھی روبہ عمل لایا جارہا ہے ،پاکستان کو خطے میں بدامنی اور امن امان کی ابتری کا مسئلہ درپیش ہے جب کہ سعودی حکومت علاقائی سلامتی کے اقدامات پر عملدرآمد میں سنجیدہ ہے، عالم اسلام کو آنے والے وقت کے تقاضوں کو مد نظر رکھتے ہوئے پر امن بقائے باہمی اور علاقائی سلامتی کے معاہدوں سمیت ملت اسلامیہ کی اجتماعی نگہبانی کا بھی کوئی میکنزم وضع کرنا چاہیے اور اس سلسلہ میں متعلقہ بین الاسلامی اداروں کا احیا ضروری ہے جب کہ اس کام کی ابتدا سعودی قیادت کے مفید مشاورت سے کی جانی چاہیے ۔

دریں اثناشہزادہ سلطان بن سلمان نے کہا کہ سلطانہ فاؤنڈیشن کا قیام ان کی والدہ کا آئیڈیا تھا ، فاؤنڈیشن کے آئندہ منصوبوں کا ذکر کرتے ہوئے انھوں نے کہا کہ ہم اپنے پروگراموں کو اسکولز سے کالجز اور میڈیکل کالجز کے ساتھ ساتھ ضرورت مند طلبہ کے لیے وظائف تک وسعت دینے کا ارادہ رکھتے ہیں، انھوں نے کہا کہ پاکستان ایک عظیم ملک ہے اور ہمیں امید ہے کہ وزیر اعظم نواز شریف کی قیادت میں یہ ترقی کے مزید منازل طے کرے گا، ہم پاکستان کا مستقبل تابناک اور روشن دیکھتے ہیں ، تعلیم اور طب کے شعبے میں پاکستان کی معاونت جاری رکھیں گے۔ تعاون و امداد کی اس یقین دہانی کے ثمرات کے حصول کے لیے ہمہ جہت منصوبہ بندی کی جائے ۔ وزیراعظم نواز شریف کو سعودی محبتوں ،اور خیر سگالی کا جو تحفہ ملا ہے اس سے اہل وطن کی تعلیمی ، سماجی اور معاشی زندگی میں انقلاب آنا چاہیے۔ شہزادہ سلطان بن سلمان بن عبدالعزیز السعودکا دورہ بلاشبہ دو طرفہ تعلقات کو مزید بہتر بنانے اورپاکستان سے سعودی عوام اور حکمرانوں کی دلی قربت و وابستگی کو مستحکم کرنے میں اہم پیش رفت کا باعث بنے گا۔

Pakistan and Saudi Arabia Relations

ہم مسلمان ہیں اور مسلمان اس وقت تک مسلمان نہیں ہو سکتا جب تک یہ اللہ‘ اس کے رسولؐ اور قرآن مجید پر ایمان نہ لے آئے اور جب اللہ‘ اس کا رسولؐ اور قرآن مجید تینوں اکٹھے ہوتے ہیں تو شریعت بنتی ہے‘ ہم اگر شریعت سے قرآن مجید کو خارج کر دیں تو یہ شریعت نہیں رہے گی‘ ہم اس میں نبی اکرم ؐ کو سائیڈ پر کر دیں تو بھی شریعت نہیں ہو گی اور ہم اگر اس میں سے اللہ تعالیٰ کو نکال دیں تو بھی شریعت شریعت نہیں رہے گی لیکن اب سوال یہ ہے‘ کیا ریاست کے لیے صرف شریعت کافی ہے یا پھر ریاست کو اچھی حکومت‘ اچھا انتظام بھی چاہیے اور اگر ریاست کو اچھی حکومت چاہیے تو کیا اچھی حکومت پہلے آئے گی یا پھر شریعت۔ ہمارا قومی مستقبل اس سوال کے جواب میں پوشیدہ ہے۔

ذوالفقارعلی بھٹو پاکستان کے پہلے حکمران تھے جنہوں نے پاکستان کو اسلامی جمہوریہ بنایا‘ جنہوں نے ملک میں شراب اور جوئے پر پابندی لگائی‘ جنہوں نے قادیانیوں کو غیر مسلم قرار دیا‘ جنہوں نے اسلامی قوانین کے نفاذ کے لیے اسلامی نظریاتی کونسل بنائی‘ جنہوں نے سرکاری اداروں میں نماز کے لیے وقفے رکھوائے اور جنہوں نے مذہبی تہواروں کے لیے چھٹیوں کا نیا نظام وضع کروایا۔ ہم جنرل ضیاء الحق کو اسلامی اقدار کا کریڈٹ دیتے ہیں جب کہ جنرل ضیاء الحق کا اسلام صرف ویسٹ کوٹ اور شیروانی تک محدود تھا‘ اصل کارنامہ ذوالفقار علی بھٹو نے سرانجام دیا تھا‘ بھٹو صاحب نے ملک کو ایک ایسا متفقہ آئین دیا جس پر ملک کے تمام جید علماء نے دستخط بھی کیے اور اسے تسلیم بھی کیا مگر پھر اس کا کیا نتیجہ نکلا‘ ملک تباہی کے دہانے تک پہنچ گیا‘ وہ ملک جسے ساٹھ اور ستر کی دہائی میں ایشیا کا لیڈر کہا جاتا تھا‘ اس کے ادارے اس قدر ڈیفالٹ میں چلے گئے کہ ملک کو فوج ’’ٹیک اوور‘‘ کرنے پر مجبور ہو گئی‘ کیوں؟ کیونکہ ذوالفقار علی بھٹو اپنے آئین‘ نفاذ شریعت کے عزائم اور اسلامی نظریاتی کونسل کو اچھی حکومت کی سپورٹ دینے میں ناکام ہو گئے تھے‘ بھٹو صاحب نے ملک کو متفقہ اور اچھا آئین تو دے دیا لیکن یہ ملک کو متفقہ اور اچھی حکومت نہ دے سکے لہٰذا ملک تمام تر نیک خواہشات کے باوجود اسلامی جمہوریہ نہ بن سکا۔ یہ ناکامی فاتح افغانستان جنرل ضیاء الحق خلدمکانی کے حصے میں بھی آئی‘ یہ بھی اپنی تمام تر دینی خواہشات اور نفاذ شریعت کے عزائم کے باوجود پاکستان کو اسلامی ریاست نہ بنا سکے۔

یہ شہادت سے قبل افغانستان میں نصف درجن امیرا المومنین بنا گئے اور ان امراء المومنین نے افغانستان کی اینٹ سے اینٹ بھی بجا دی مگر جنرل صاحب پاکستان کے لیے سلطان صلاح الدین ایوبی یا حضرت عمر بن عبدالعزیزؒ جیسے حکمران کا بندوبست نہ کر سکے‘ یوں بھٹو بھی ناکام رہا اور جنرل ضیاء الحق بھی اور ان کے بعد محترمہ بے نظیر بھٹو اور میاں نواز شریف بھی اور حتیٰ کہ چوہدری شجاعت حسین بھی۔ چوہدری صاحب کی مٹی ختم ہو گئی لیکن پاکستان میں نفاذ شریعت کا پودا سر نہ اٹھا سکا‘ ہم جمہوریہ بن سکے اور نہ ہی اسلامی جمہوریہ!اس کی وجہ وہی تھی‘ ہماری دینی خواہشات کو اچھی اور مضبوط حکومت نہ ملی سکی۔ میں دنیا کے نامور مورخین‘ جید علماء کرام اور پاکستان کے سکہ بند مفتیان سے ایک سوال کرنا چاہتا ہوں ’’کیا نبی اکرمؐ نے مدینہ منورہ میں ریاست پہلے قائم کی تھی یا شریعت پہلے نافذ کی تھی؟‘

‘ آپ کا جواب اگر شریعت ہے تو پھر سوال پیدا ہوتا ہے‘ قرآن مجید کی آخری آیت 10 ہجری کو نازل ہوئی اور مدینہ منورہ کی ریاست پہلی ہجری میں قائم ہوئی لہٰذا پہلی ہجری سے 10 ہجری تک مدینہ منورہ کا نظام کیا تھا؟ کیا پھر یہ حقیقت نہیں مدینہ منورہ میں اس وقت اچھی حکومت تھی اور اچھی حکومت مدینہ منورہ میں شریعت سے قبل آئی تھی‘ اللہ کے رسولؐ نے سود کے خاتمے کا اعلان میدان عرفات میں حجتہ الوداع کے موقع پر فرمایا ‘ میں دنیا کے اس عظیم سماجی چارٹر میں سے وہ فقرے آپ کے حضور پیش کرتا ہوں‘ رسول اللہ ﷺ نے فرمایا ’’اور آج سے ہر قسم کا سود ختم کیا جاتا ہے لیکن تم اپنی اصل رقم واپس لے سکتے ہو مگر تم بے انصافی نہیں کرو گے اور نہ تم سے بے انصافی ہو گی‘ اللہ کا فیصلہ ہے سود جائز نہیں اور جو سود سب سے پہلے ختم کیا جاتا ہے‘ وہ عباسؓ بن عبدالمطلب کا سود ہے‘ یہ سب کا سب کالعدم ہے‘‘ آپ لوگ عالم دین ہیں‘ آپ قرآنی آیات کے نزول کے دن نکال کر دیکھ لیجیے‘ حضرت عباسؓ نے کب اسلام قبول کیا تھا اور ان کے سود کو کب کالعدم قرار دیا گیا تھا؟ شریعت پھر اتنا عرصہ سود کے معاملے میں کیوں خاموش رہی؟ ہم مسلمان ہیں اور کوئی مسلمان سود کی حمایت نہیں کر سکتا کیونکہ اسے ہمارے اللہ اور ہمارے اس رسولؐ نے ناجائز قرار دیا جن کی آن پر ہماری ہزاروں جانیں قربان لیکن اس کے باوجود یہ حقیقت ہے‘ ریاست میں اچھی اور مضبوط حکومت پہلے آتی ہے اور شریعت بعد میں۔

ہم اب اچھی حکومت کی طرف آتے ہیں‘ ہندوستان کا ایک بادشاہ تھا غیاث الدین بلبن‘ یہ ترک النسل تھا اور سلطان التتمش کا غلام تھا‘ یہ 1266ء میں ہندوستان کا بادشاہ بنا اور 21 سال حکمران رہا‘ یہ سخت مزاج‘ ڈسپلن کا پابند اور امن و امان کا داعی تھا‘ بلبن کے بارے میں کہا جاتا تھا‘ یہ خود ہنستا تھا اور نہ ہی اس کے سامنے کسی کو ہنسنے کی جرأت ہوتی تھی‘ بلبن جوانی میں ہر قسم کے عیب میں مبتلا تھا‘ یہ شراب بھی پیتا تھا‘ یہ رقص و سرود کی محفلیں بھی برپا کرتا تھا اور یہ دولت لٹانے کی عادت بد میں بھی مبتلا تھا لیکن جوں ہی اقتدار سنبھالا ‘ اس نے تمام بری عادتوں سے توبہ کرلی‘ یہ ہمیشہ باوضو رہتا تھا‘ تہجد‘ چاشت اور اشراق تک کی نماز قضا نہیں کرتا تھا‘ علماء کا احترام کرتا تھا‘ راضی برضا رہتا تھا‘ روز قبرستان جاتا تھا‘ قبریں دیکھتا تھا اور ہر حال میں ساتھیوں کے جنازوں میں شریک ہوتا تھا‘ اس کے غلاموں نے اسے کبھی ننگے سر اور ننگے پاؤں نہیں دیکھا تھا لیکن ان تمام مذہبی عادات کے باوجود وہ لاء اینڈ آرڈر پرکوئی سمجھوتہ نہیں کرتا تھا‘ باغی چاہے مسلم ہو یا غیر مسلم وہ اسے پوری طاقت سے کچل دیتا تھا.

وہ ایک شخص کی بغاوت یا سرکشی پر پورا شہر اور سارا لشکر قتل کرا دیتا تھا‘ وہ ہر حال میں قانون پر عمل درآمد کراتا تھا اور وہ اس کے لیے کسی بھی شخص کو کسی بھی قسم کا استثنیٰ نہیں دیتا تھا‘ مجرموں کے معاملے میں وہ اس قدر سنگ دل واقع ہوا تھا کہ وہ ان کی گرفتاری کے لیے فوج کو جنگ میں جھونک دیتا تھا‘ اس کا دور ہندوستان کے سنہری ترین ادوار میں شمار ہوتا تھا‘ وہ 1287ء میں انتقال کر گیا لیکن آپ اس کی رٹ ملاحظہ کیجیے‘ غیاث الدین بلبن کے مرنے کے ساٹھ سال بعد تک ہندوستان کی سڑکیں محفوظ رہیں‘ لوگوں کا خیال تھا غیاث الدین بلبن ہمیں قبر میں دیکھ رہا ہے اور ہم نے جوں ہی کسی کو لوٹنے کی کوشش کی‘ وہ قبر سے اٹھے گا‘ ہماری گردن اتارے گا اور دوبارہ قبر میں جا کر سو جائے گا‘ یہ ہوتی ہے ریاست اور یہ ہوتی ہے اچھی حکمرانی۔ آپ آج کے دور میں ڈنمارک کی مثال لیجیے‘ یہ چھوٹا سا ملک ہے‘ ہم اس کو اخلاقی لحاظ سے قطعاً آئیڈیل ملک نہیں کہہ سکتے کیونکہ اس ملک میں جنسی بے راہ روی بھی ہے‘ سودی کاروبار بھی‘ فحاشی بھی‘ عریانی بھی‘ شراب خانے بھی اور رقص گاہیں بھی مگر آپ لاء اینڈ آرڈر کی صورتحال ملاحظہ کیجیے‘ ڈنمارک میں 75 برس میں قتل کی صرف 15 وارداتیں ہوئیں جب کہ ڈاکہ زنی‘ چوری اور زنا کاری کی وارداتیں نہ ہونے کے برابر ہیں‘ ڈنمارک میں پولیس اور عدالتی عملہ فارغ بیٹھا رہتا ہے۔

حکومت جیلیں ختم کر کے انھیں ہاسٹل اور ہوٹلز میں تبدیل کر رہی ہے‘ ہم اس کے مقابلے میں اپنے ملک کو دیکھیں تو صرف کراچی شہر میں روزانہ 15لوگ ناحق مارے جاتے ہیں‘ ہمارے پاس پانچ لاکھ پولیس اہلکار ہیں مگر ہم ان کی کمی کا رونا روتے رہتے ہیں‘ ہمارے ججوں کے پاس روزانہ دو دو‘ تین تین سو مقدموں کی فائلیں آتی ہیں‘ ہماری جیلوں میں قتل کے پانچ ہزار قیدی سزائے موت کے منتظر ہیں‘ 87 ہزار مجرم جیلوں میں بند ہیں اور ہمیں اگلے دس برسوں میں جیلوں کی تعداد میں چار گنا اضافہ کرنا پڑے گا‘ ہمارے ملک میں چھوٹی بچیوں کے ساتھ زیادتی ہوتی ہے‘ عورتوں کے منہ پر تیزاب پھینکا جاتا ہے‘ مسجدوں کے دروازے سے جوتے اٹھائے جاتے ہیں‘ مسجدوں کے پنکھے چوری ہوتے ہیں اور قبروں کی سلیں تک اٹھا لی جاتی ہیں‘ بینک بھی لوٹے جاتے ہیں‘ لوگ بھی اغوا ہوتے ہیں اور مسلمانوں کو مسجدوں میں نماز کے دوران شہید بھی کر دیا جاتا ہے چنانچہ ملک کون سا اچھا ہوا‘ وہ جس میں 75 برسوں سے صرف 15 قتل ہوئے یا پھر وہ جس کے ایک ایک شہر میں روزانہ 15 قتل ہو رہے ہیں‘ آپ کبھی ٹھنڈے دل سے سوچئے گا؟ سعودی عرب ہمارے لیے محترم ترین ملک ہے لیکن لوگ احرام میں ہیروئن چھپا کر جدہ اترتے ہیں‘ لوگوں کو وہاں سنگ سار بھی کیا جاتا ہے‘ ان کی گردنیں بھی اتاری جاتی ہیں اور ان کے ہاتھ بھی کاٹے جاتے ہیں لیکن اس کے باوجود جرائم نہیں رک رہے‘ آپ دوسرے اسلامی ملکوں کو بھی دیکھ لیجیے‘آپ کو وہاں کی صورتحال بھی آئیڈیل نظر نہیں آئے گی‘ کیوں؟ کیونکہ ہم سب مسلمان نبی اکرمؐ کی ترتیب کے مطابق نہیں چل رہے‘ ہم حکومتی نظام اور حکمرانوں کو بہتر بنانے سے قبل شریعت نافذ کرنا چاہتے ہیں‘ ہم اچھی حکومت قائم کرنے کے بجائے ریاست کو شریعت سے اسٹارٹ کرنا چاہتے ہیں اور یوں ہم الجھ جاتے ہیں۔

میرا علماء کرام سے ایک اور سوال بھی ہے ’’شریعت پر عمل کی ذمے داری کس پر عائد ہوتی ہے‘ حکومت پر یا علماء کرام پر؟ کیا ہمیں شریعت کے نفاذ کے لیے مضبوط اور اچھی حکومت کی ضرورت نہیں پڑے گی مگر جس ریاست میں گاؤں کے لوگ گیس پائپ لائین کی مرمت نہ کرنے دیں یا شر پسند عناصر پائپ لائین اڑا جائیں اور ریاست انھیں گرفتار نہ کر سکے کیا وہ ریاست ملک میں شریعت نافذ کر سکے گی اور جس میں حکومت پاکستان کرکٹ بورڈ کے چیئرمین ذکاء اشرف سے اپنا فیصلہ نہ منوا سکے‘ جس میں حکومت عوام سے بجلی کے بل وصول نہ کر سکے‘ کنڈے نہ اتروا سکے اور جس میں حکومت ٹرین کے وقت ریلوے کے پھاٹک بند نہ کروا سکے‘ کیا آپ سمجھتے ہیں وہ حکومت ملک میں اسلامی قوانین نافذ کر دے گی‘‘ اچھی اور مضبوط حکومت کے بغیر شریعت آ سکے گی اور نہ ہی اسلامی قوانین ‘ یہ وہ حقیقت ہے جسے ہمیں بہرحال تسلیم کرنا ہوگا۔

جاوید چوہدری  

برق صرف بے چارے پاکستانیوں پر ہی کیوں گرتی ہے؟اس سوال کا جواب بہت ڈھونڈا۔ گزشتہ چند سالوں کے دوران چین سے جنوبی کوریا تک ‘ امریکہ سے برطانیہ تک اور سعودی عرب سے ملائیشیا و انڈونیشیا تک‘ دنیا کے کونے کونے میں گھومنے کا موقع ملا۔ ہر جگہ دوسری اقوام سے اپنی قوم کا موازنہ کرتارہا۔ ہمارے ملک میں بے حیائی ہے لیکن دنیا کے بیشتر ممالک میں یہ پاکستان سے کئی گنا زیادہ ہے ۔ پاکستان میں کرپشن ہے لیکن دنیا کا کوئی ملک بھی کرپشن سے یکسرپاک نہیں۔ نمازیں پاکستان میں زیادہ پڑھی جاتی ہیں،عمرے اور حج پر جانے والوں میں پاکستانی سرفہرست ہیں، مدرسے یہاں پر زیادہ ہیں،دینی جماعتوں کی یہاں بہتات ہے،تبلیغی جماعت دنیا کے کسی بھی ملک کے مقابلے میں یہاں سب سے زیادہ مضبوط ہے، اللہ اور رسول کے نام پر لڑنے اور مرنے والے دنیا کے کسی بھی ملک کے مقابلے میں پاکستان کے اندر زیادہ ہیں پھر امریکہ اور جاپان یا ترکی اور یو اے ای کے بجائے پاکستان ہی کیوں دہشتستان بنا ہوا ہے۔ باقی دنیا کیوں جنت کا منظر پیش کررہی ہے اور پاکستان میں جینا کیوں عذاب بن گیا ہے؟

مجھے ایک ہی وجہ نظر آئی۔ منافقت اور دوغلے پن میں ہم نمبرون ہیں، کسی قوم میں اتنی منافقت دیکھنے کو نہیں ملتی جتنی کہ پاکستان میں دیکھنے کو ملتی ہے ۔ یہ وہ ملک ہے جہاں منافقت اور دوغلے پن کی وجہ سے بہادر اور بزدل ‘ شریف اور کمینے‘ حرام خور اور حلال خور ‘ سچے اور جھوٹے ‘ رہبر اور رہزن حتیٰ کہ محب وطن اور غدار کا فرق کرنا مشکل ہوگیا ہے۔ یہاں فرشتوں کے روپ میں شیطان پھرتے ہیں اور بعض شیطان مشہور ہونے والوں کو قریب سے دیکھو تو فرشتہ دکھائی دے گا۔ یہاں جھوٹا‘ سچ کی تبلیغ کرتا ہوا نظر آتا ہے اور سچے کے سچ پر یقین کرنا مشکل ہوگیا ہے ۔ گیدڑوں نے شیر کا روپ دھار لیا ہے اور شیروں سے گیدڑوں جیسا سلوک کیا جاتا ہے۔ رحمت سید لولاکﷺ پر کامل ایمان کے باوجود پاکستان میں بسنے والے مسلمانوں کو یہاں پر بسنے والی امت سید لولاکﷺ سے خوف آتا ہے ۔ منافقت کی یہ لعنت معاشرے کی رگ رگ میں سرائیت کرچکی ہے حالانکہ ہم سب جانتے ہیں کہ آخرت میں منافق کا ٹھکانہ کافروں سے بھی بدتر ہوگا ۔ رب کائنات نے شاید دنیا میں بھی منافقت کی سزا کفر سے بدتر مقرر کی ہے ‘ اس لئے آج عالم کفر سکون میں اور ہم پاکستانی ایک دردناک اور کربناک عذاب میں مبتلا ہیں ۔ اسی منافقت کا نتیجہ ہے کہ ہمارا ملک سیاستدانوں سے بھر گیا لیکن لیڈر یا رہنما کوئی نظر نہیں آتا۔ سیاستدان قوم کے جذبات سے کھیلتا تو لیڈر ان کے جذبات کو قابو میں لاتا اور اسے عقل و شعور کے تابع بناتا ہے۔

سیاستدان قوم کا رخ دیکھ کر اس کے پیچھے چلتا ہے جبکہ لیڈر قوم کی رہنمائی کرتا ہے۔ سیاستدان وہی موقف اپناتا ہے جو قوم کو اچھا لگے لیکن لیڈر قوم کو حاضر و موجود سے بے زار اور تلخ حقائق سے روشناس کراتا ہے۔ آج ہر طرف نظر دوڑائیں تو ہماری مجموعی قومی قیادت (مذہبی اور سیاسی) ان بیماریوں کی شکار نظر آتی ہے لیکن افسوس کہ اب میڈیاکا بھی ایک حصہ سیاستدانوں کے نقش قدم پر چلنے لگا ہے۔ مذہبی اور سیاسی رہنمائوں کی طرح پاکستانی میڈیا بھی بظاہر بہت متحرک نظر آتا ہے لیکن ان کی طرح اس میں بھی منافقت کی بیماری بدرجہ اتم داخل ہوگئی ہے۔ اور لگتا ہے کہ یہ ایک سنجیدہ نہیں بلکہ سیاستدان میڈیا ہے ۔ پاپولرزم اس کا دین اور سطحیت اس کا وتیرہ بن گیا ہے۔ مستثنیات سے کوئی شعبہ مستثنیٰ نہیں اور جس طرح سیاستدانوں یا مذہبی رہنمائوں میں بعض کی ریٹنگ اللہ اور قوم کے دربار میں اچھی ہے ‘ اسی طرح میڈیا میں بھی بعض لوگ مذکورہ بیماریوں سے پاک ہوں گے تاہم ان میں سے بعض ویورشپ اور ریڈرشپ کے غلام ہیں جو ٹاک شو کرتے یا خبر دیتے وقت قوم کی آگاہی یا ایجوکیشن نہیں بلکہ ریٹنگ ہی کو مد نظررکھتے ہیں اور کالم لکھتے وقت بھی یہ بعض کالم نگاروں کے پیش نظر یہی رہتا ہے کہ کس طرح اس پر اکثریت کی طرف سے واہ واہ کے نعرے بلند ہوں۔

سیاستدانوں کی طرح بعض میڈیا والے بھی بزدل ہو کر بہادر دکھنا چاہتے ہیں،ان کی طرح بعض لکھنے والے بھی وہی موقف اپناتے ہیں جس پر دیکھنے اور پڑھنے والوں کی اکثریت خوش ہو۔ بعض سیاستدانوں کی طرح یہ بھی اندر سے کھوکھلے ہیں لیکن باہر سے پارسائی کی چادر اوڑھ رکھی ہوتی ہے۔ ان کی طرح بعض نے یہ وتیرہ بھی اپنا رکھا ہے کہ ٹی وی پر آکر جس کو للکارتے ہیں‘ شام کو ان کی قدم بوسی کے لئے حاضر ہوجاتے ہیں۔ یہی وجہ ہے کہ ہمارے میڈیا کا ایک حصہ خبر کے نام پر قوم کو بے خبر بنا رہا ہے۔

دعویٰ یہ ہے کہ وہ قوم کی تربیت کررہا ہے لیکن اندر سے قوم کو کنفیوزڈ کررہا ہے۔ طالبان کے مسئلے کو لے لیجئے۔ پچھلے دس سالوں میں میڈیا کے ایک حصے نے جتنی زیادہ خبریں اس موضوع سے متعلق دی ہیں‘ کسی اور موضوع سے متعلق نہیں دیں۔ جتنے تبصرے اس موضوع پر ہوئے ‘ کسی اور موضوع پر نہیں ہوئے ۔ جتنے کالم اس سے متعلق لکھے گئے‘ کسی اور موضوع سے متعلق نہیں لکھے گئے ۔ جتنے ٹاک شوز کا اہتمام اس موضوع سے متعلق کیا گیا ‘ اس کا کوئی مقابلہ نہیں لیکن ان سب کچھ کے باوجود آج بھی قوم طالبان کی حقیقت سے بے خبر ہے۔ سول سوسائٹی کے پڑھے لکھے لوگوں سے لے کر پارلیمنٹیرین تک ‘ اس موضوع کو سمجھنے سے قاصر ہیں۔ جس بھی محفل میں بیٹھیں پہلا سوال یہ ہوتا ہے کہ یہ طالبان کون ہیں؟ جتنے منہ اتنی باتیں والا معاملہ ہے۔ کسی کے نزدیک وہ اسلام کے سپاہی تو کسی کے نزدیک دہشت گرد ہیں۔ کوئی انہیں پاکستانی ایجنسیوں کا تو کوئی غیرملکی ایجنسیوں کے ایجنٹ سمجھتا ہے ۔ کوئی انہیں پختونوں سے جوڑ رہا ہے تو کسی کے نزدیک یہ پختونوں کے خلاف سازش ہے۔ کسی کے نزدیک وہ مدرسوں کی تو کسی کے نزدیک یہ معاشی جنگ کی پیداوار ہیں۔

یہی وجہ ہے کہ پاکستان کا نمبرون مسئلہ بن جانے کے باوجود آج پوری ریاست اس مسئلے سے متعلق کنفیوزڈ ہے اور اسی کنفوژن کی وجہ سے آج ریاستی ادارے بے بس نظر آتے ہیں۔ دوسری طرف سب فریق میڈیا پر برہم ہونے لگے ہیں۔ اسٹیبلشمنٹ کو شکوہ ہے کہ میڈیا طالبانائزیشن پھیلارہا ہے اور طالبان میڈیا کو اسٹیبلشمنٹ کا مہرہ سمجھتے ہیں۔ ایک بڑا طبقہ یہ الزام دے رہا ہے کہ میڈیا امریکہ اور ہندوستان کے ایجنڈے پر عمل پیرا ہے اور دوسری طرف امریکہ پاکستانی میڈیا کو اپنے خلاف فضا کا ذمہ دار سمجھتا ہے ۔ سیاستدان سب سے زیادہ میڈیا پر برہم ہیں اور مذہبی طبقات اس کی زبان بندی کے خواہشمند ۔ میڈیا سب کو خوش کرنا چاہتا تھا اور نتیجہ یہ نکلا کہ آج اپنے بھی خفا ہم سے ہیں بیگانے بھی ناخوش والا معاملہ ہے۔ ہم میڈیا والوں کی گناہوں کی فہرست بہت طویل ہے اور ان کی تلافی کرتے کرتے عمر گزر جائے گی لیکن کیوں نہ تلافی کا آغاز کرتے ہوئے ہم آج ہم یہ عہد کرلیں کہ کم ازکم طالبان اور عسکریت پسندی کے مسئلے پر ہم اپنی صحافت نہیں چمکائیں گے ۔ کم ازکم اس مسئلے پر جذبات سے نہیں کھلیں گے۔ سچ نہیں بول سکتے تو کم ازکم جھوٹ نہیں بولیں گے ۔ عافیہ صدیقی اور لال مسجد کی ہم اگر حقیقت سامنے نہیں لاسکتے تو ان جیسے ایشوز پر غلط بیانی نہیں کریں گے۔ ہم اگر اپنی اور قوم کی کنفیوژن ختم نہیں کرسکتے تو کم ازکم اس مسئلے پر بول بول اور لکھ لکھ کر اس میں مزید اضافہ نہیں کریں گے۔

سلیم صافی
بشکریہ روزنامہ "جنگ"

پولیس اہلکار سید علی شاہ کے لیے آج کل زندگی گزارنا کسی آذیت سے کم نہیں۔ وہ چار سال پہلے پشاور میں ایک خودکش حملے کا نشانہ بنے جس کی وجہ سے وہ اپنے دونوں پاؤں سے محروم ہوئے۔

سید علی شاہ کے لیے اب مصنوعی اعضاء ہی سہارا ہیں تاہم ایسی صورتحال میں وہ محنت مزدوری نہیں کرسکتے، وہ چھ بچوں کے باپ بھی ہیں۔

ان کا کہنا ہے کہ جب سے وہ معزور ہوئے ہیں محکمہ پولیس نے انہیں اس طرح نظر انداز کردیا ہے کہ جیسے وہ کبھی اس کا حصہ نہیں رہے۔

"میں نے اپنی جوانی پولیس کےلیے قربان کی اور یہاں تک فرائض کے بجا آوری کے دوران میرے دونوں پاؤں بھی کٹ گئے لیکن بدقسمتی سے محکمے کے تمام افسران اور قریبی دوستوں نے بھی منہ موڑ لیا ہے جن کے ساتھ کئی برسوں تک ایک تھالی میں کھایا پیا۔"

انہوں نے کہا ’میں نے اپنی جوانی پولیس کےلیے قربان کی اور یہاں تک فرائض کے بجا آوری کے دوران میرے دونوں پاؤں بھی کٹ گئے لیکن بدقسمتی سے محکمے کے تمام افسران اور قریبی دوستوں نے بھی منہ موڑ لیا ہے جن کے ساتھ کئی برسوں تک ایک تھالی میں کھایا پیا۔‘

سید علی شاہ کے مطابق ’معاشی پریشانیوں نے گھر میں بسیرا کیا ہوا ہے، میرا خاندان بھی بڑا ہے صرف تنخواہ پر گزارا نہیں ہوتا ایسے دن بھی آتے ہیں کہ بجلی کے بل اور مکان کا کرایہ تک ادا نہیں کرسکتے۔‘

پاکستان کے صوبہ خیبر پختون خوا میں دہشت گردی کے خلاف جاری مبینہ جنگ میں ڈیوٹی کے دوران اب تک 800 سے زائد پولیس اہلکار جان دے چکے ہیں جن میں سپاہی سے لے کر ڈی آئی جی رینک تک کے افسران شامل ہیں۔ تاہم مرنے والے اکثریتی اہلکار چھوٹے رینک کے بتائے جاتے ہیں جو عام طورپر غریب خاندانوں سے تعلق رکھتے ہیں۔

اکثر اہلکاروں کے اہل خانہ حکومتی وعدے پورے نہ ہونے پر انتہائی مایوسی کا شکار نظر آتے ہیں۔

چار سال پہلے پشاور پریس کلب پر ہونے والے ایسے ہی ایک خودکش حملے میں پولیس کانسٹیبل ریاض الدین بھی ہلاک ہوئے تھے۔

ان کے صاحبزادے عزیر ریاض کا کہنا ہے کہ ’سابق دور حکومت میں شامل وزراء اور دیگر اہلکار کسی نہ کسی حد تک ان سے رابطے میں رہتے تھے اور ان کے مسائل بھی حل کراتے تھے۔ لیکن موجودہ حکومت کے وزراء تو مرنے والے اہلکاروں کے جنازوں میں بھی نہیں جاتے وہ شہداء کے ورثاء کی کیا امداد کریں گے۔‘

"سابق دور حکومت میں شامل وزراء اور دیگر اہلکار کسی نہ کسی حد تک ان سے رابطے میں رہتے تھے اور ان کے مسائل بھی حل کراتے تھے۔ لیکن موجودہ حکومت کے وزراء تو مرنے والے اہلکاروں کے جنازوں میں بھی نہیں جاتے وہ شہداء کے ورثاء کی کیا امداد کریں گے۔"

انہوں نے کہا کہ حکومت کی طرف سے ان کے خاندان کے ساتھ کیے گئے وعدوں کو چار سال گزرگئے لیکن اس کے باوجود وہ ایفا نہیں کیے گئے جس سے ان کا خاندان سخت مایوس ہوچکا ہے۔

تجزیہ نگاروں کا کہنا ہے کہ اکثر اوقات محمکۂ پولیس لوگ ہی مرنے والے ساتھیوں کے ورثاء کو ملنے والی مراعات کے راہ میں روکاٹیں ڈالتے ہیں۔

پشاور کے سنئیر صحافی علی حضرت باچا نے بتایا کہ ڈیوٹی کے دوران ہلاک ہونے والے پولیس اہلکاروں کو تیس لاکھ روپے، پلاٹ اور کفن دفن کےلیے بھی تین لاکھ روپے دیئے جاتے ہیں لیکن افسوس کہ اپنے ہی لوگ بیواؤں سے رشوت طلب کرتے ہیں۔

اکثر لوگ یہ سوال بھی کرتے ہیں کہ کسی ریاست کی بے حسی اس سے زیادہ اور کیا ہوگی جب وہ اپنے ہی لوگوں کی قربانیوں کی قدر نہ کرے اور ایسی صورتحال میں کوئی اور ریاست کی خاطر جان جیسی قیمتی قربانی کیوں کر دے گا۔

امریکیوں کے بارے میں کہا جاتا ہے کہ وہ تمام تر مادی کامیابی اور طاقت کے باوجود احمقانہ طرز عمل اپنانے میں ماہر ہیں۔ ان کے بارے میں مثل مشہور ہے کہ وہ سیدھا رستہ اپنانے سے پہلے تمام الٹے راستے اختیار کرتے ہیں۔ وہاں پر مات کھاتے ہیں، کبھی کبھی مار بھی کھاتے ہیں‘ پھر تمام تکالیف اٹھانے کے بعد اسی جگہ پر آن کھڑے ہوتے ہیں جہاں پر انھوں نے صحیح کے بجائے غلط راستہ اختیار کرنے کا فیصلہ کیا تھا۔ امریکا کے اس طور طریقے کے بارے میں نقادوں کا کہنا ہے کہ اس کی جڑیں امریکا کی اس نفسیات میں گڑی ہوئی ہیں جس کے تحت وہ بیک وقت مکمل خوف اور ضرورت سے زیادہ پر اعتمادی کا شکار رہتا ہے۔ اس متضاد کیفیت میں ہونے کی وجہ سے اس کو صحیح مشورہ سمجھ نہیں آتا۔ وہ مشورہ دینے والے کو کم عقل اور خود کو عقل کل گردانتے ہوئے صاحب رائے کو جھٹک کر پرے پھینک دیتا ہے۔ خواہ مخواہ کے تجربات کی دلدل میں چھلانگ لگاتا ہے اور بعد میں ہائے ہائے کرتا ہوا وہاں سے نکلنے کی کوشش کرتا ہے۔ ان نقادوں کے نزدیک ان غلطیوں کے باوجود امریکا صرف اس وجہ سے کامیاب ہو جاتا ہے کہ آخر میں صحیح رستہ پہچان لیتا ہے۔

چونکہ ہم نے بین الاقوامی اور بڑی طاقتوں کی حماقتوں کا ریکارڈ توڑنے کی ٹھانی ہوئی ہے۔ لہذا ہم نے امریکا کے اس ’’حماقت کے بعد لیاقت‘‘ ماڈل میں تبدیلی کی ہے اور اس کو نئے تجربات سے آراستہ کرتے ہوئے اپنے رنگوں سے نمایاں کیا ہے ۔ ہمارے تبدیل شدہ ماڈل کے مطابق صحیح مشورے کو رد کر کے الٹے رستوں کے ذریعے الٹے کام کرنا ہی کافی نہیں۔ یہ سب کچھ کرنے کے بعد دوبارہ سے نقطہ آغاز پر واپس آتے ہوئے پھر سے الٹے کام کو دہرانے میں ملکہ حاصل کرنے کی ضرورت ہے۔ یعنی امریکی تو مار کھا کے عقلمند ہو جاتے ہیں مگر ہم نے حماقتوں کو ایسے مدار میں تبدیل کرنا ہے جس میں سے ہم کبھی نہ نکل سکیں۔ بیشک چکر کھاتے کھاتے تباہ ہو جائیں، غلطیوں سے سیکھنے کی ضرورت نہیں ہے۔

معذرت چاہتا ہوں تمہید ذرا لمبی ہو گئی۔ مگر اس حیران کن انداز سے محترم وزیر اعظم اپنے ماضی کو جلدی جلدی دہرا رہے ہیں، اس کو سمجھنے اور سمجھانے کے لیے یہ سیاق و سباق بتانا ضروری تھا۔ دو ادوار حکومت میں میاں نواز شریف نے شک کا بہت فائدہ اٹھایا اور اپنی حکومتوں کی کمزور کارکردگی کو روایتی سازشوں کی کارستانی قرار دیا ۔ اپنی کوتاہیوں اور فضول فیصلوں کو جمہوریت کی طرف ’’ مشکل سفر‘‘ کے مرحلوں کے حوالے سے عوام کے سامنے رکھا اور جرنیل پرویز مشرف کے حادثے کے بعد ہر کسی کو یہ بتایا کہ جب تک طالع آزما کو لگام نہیں دی جاتی (اور ان کو بھاری مینڈیٹ نہیں ملتا) تب تک یہ قوم جمہوریت کے ثمرات اور رحمتوں سے آشنا نہیں ہو سکے گی۔ مگر افسوس کہ ان دونوں شرائط کے پورے ہو جانے کے باوجود میاں نواز شریف، ان کے سیاسی انداز و اطوار، فیصلہ سازی کے طریقے اور ان کے گرد پھیلا ہوا چاپلوسوں کا ہجوم جوں کا توں ہے۔ کچھ بھی نہیں بدلا۔ نہ ذہن بدلا اور نہ فیصلے۔ پاکستان کرکٹ بورڈ کو فٹ بال بنانے میں نجم سیٹھی جیسے کرداروں کا کوئی حصہ نہیں ہے۔

مالاکنڈ سے سفر کے دوران واپسی پر میں نے محترم وزیر اطلاعات کی موجودگی میں وزیر اعظم سے پاکستان کرکٹ بورڈ کے معاملات کو صحیح طریقے سے چلانے کا معاملہ اٹھایا ۔ یہ وہ دن تھا جب اسلام آباد ہائی کورٹ نے اپنا فیصلہ صادر کر کے نجم سیٹھی کو قانونی اور آئینی آئینہ دکھا دیا تھا۔ میری بات سننے کے بعد وزیر اعظم نے عجیب و غریب قسم کی خاموشی اختیار کی جس سے نہ یہ پتا چلتا تھا کہ وہ سوچ رہے ہیں اور نہ ہی یہ معلوم پڑتا تھا کہ وہ سوچ چکے ہیں۔ پھر یکدم ان کے ایک جملے نے خاموشی کا پردہ چاک کیا اور ان کے ذہن کو افشا کر دیا ۔ فرمانے لگے کہ اسلام آباد ہائیکورٹ کے فیصلے کے بعد اور بھی کئی طریقے ہیں جس کے ذریعے نجم سیٹھی دوبارہ واپس آ سکتا ہے۔ ساتھ بیٹھے ہوئے سلیم صافی نے اس مسئلے کے اخلاقی پہلو اجاگر کرنے کی کوشش کی مگر میں نے ان کو اور وزیر اعظم کو خواہ مخواہ کی خفت سے بچانے کی کوشش کرتے ہوئے بات بدل دی۔ بہر حال وزیراعظم کے رد عمل سے یہ امر واضح ہو گیا تھا کہ وہ ہر صورت نجم سیٹھی کو خوش رکھیں گے۔

یہ سب کچھ دیکھ کر مجھے میاں نواز شریف کے پہلے دونوں ادوار یاد آنے شروع ہو گئے جب وہ سینیٹر سیف الرحمان جیسے لوگوں کے ہاتھوں اپنی حکومت کی درگت بننے کے باوجود صورت حال کی نزاکت کو کبھی نہ بھانپ پائے ۔ دوسرے اسکینڈلز کے علاوہ اس وقت بھی کرکٹ میں سیف الرحمان کے بھائی کو گھسانے کا تنازعہ نواز شریف کی طبیعت کے اس پہلو کی مثال بن گیا تھا جس کے اثر کے تحت وہ اپنے پاؤں پر کلہاڑیاں مار کر خوب خوش ہوتے ہیں ۔ پندرہ سال میں اگر میاں نواز شریف نے کچھ سیکھا ہے تو وہ یہ کہ ان کو ماضی سے کچھ سیکھنے کی ضرورت نہیں ۔ ان کی نظر میں مینڈیٹ ایک ایسا منہ زور بھینسا ہے جس کو قابو میں لانے کی کوئی ضرورت نہیں ۔ وہ جیسی مرضی تباہی مچائے اس کا ادھم، دھما چوکڑی اور تباہی سب کچھ قابلِ دفاع ہے۔ پہلے کی طرح میاں نواز شریف آج بھی اپنے مینڈیٹ کی زد میں نظر آ رہے ہیں۔

بشکریہ روزنامہ "ایکسپریس"

وزیراعظم میاں محمد نوازشریف کی زیرصدارت مشترکہ مفادات کونسل نے ملکی ترقی کو تمام صوبوں اور وفاق کی مشترکہ ذمے داری قرار دیتے ہوئے پاور سیکٹر کی نجکاری کی پالیسی جاری رکھنے کی منظوری دی ہے۔ بجلی پیدا اور تقسیم کرنیوالی13کمپنیوں کو نجی شعبے کے حوالے کرنے پر اتفاق کیا گیا۔ تقسیم کارکمپنیوں کی مرحلہ وار نجکاری کا فوری آغاز کردیا جائے گا۔ کونسل نے تھرکول پاور پراجیکٹ کے لیے وفاق کی خودمختار ضمانت کی منظوری دیدی ۔ ملکی معیشت کے استحکام کے عمل کی نگرانی اور قومی سطح پر ترقی و خوشحالی کے اہم منصوبوں کی تکمیل کے حوالے سے مشترکہ مفادات کونسل کا اجلاس اور اس کے فیصلے خوش آیند ہیں، کونسل کا در حقیقت احیا ضروری ہے کیونکہ صوبوں کے مابین عدم اتفاق، اختلافات، بدگمانی ، نامناسب معاشی ترجیحات،اسکیموں پر عمل درآمد اور مالیاتی وسائل کی تقسیم سے متعلق شکایتوں اورغلط فہمیوں کے ازالے کا ہر امکان موجود ہوتا ہے، ماضی میں آمریت سے ہٹ کر جمہوری دور میں بھی مشرکہ مفادات کونسل کو نظر انداز کرکے کاروبار مملکت چلانے کی بھونڈی کوششیں کی گئیں جن کا یہ نتیجہ نکلا ہے کہ ادارہ جاتی ٹوٹ پھوٹ ،بد انتظامی ، بے محابہ کرپشن،عدم جوابدہی ، نوکرشاہانہ رعونت اور افسر شاہی کی مجرمانہ غفلت کے باعث توانائی سمیت لاتعداد بحران مگر مچھ کی طرح منہ کھولے معاشی استحکام کو ہڑپ کرنے پر تیار نظر آتے ہیں۔

شنید ہے کہ وزیراعظم نواز شریف نے کونسل کے اجلاس کی صدارت کرتے ہوئے نیپرا کی کارکردگی پر سخت عدم اطمینان اور ناراضگی کا اظہار کرتے ہوئے ادارے میں انتظامی اور مالیاتی بے قاعدگیوں کا نوٹس لیا۔ نیپرا میں صوبوں کی نمایندگی موثر بنانے کی ہدایت کی ۔وزیراعظم نوازشریف نے کہا کہ ملکی ترقی تمام صوبوں اور وفاق کی مشترکہ ذمے داری ہے ۔ان کا یہ اعتراف کہ سابق ادوار میں غیرضروری بھرتیوں اور بدعنوانیوں کے نتیجے میں سرکاری اداروں میں بدانتظامی انتہا کو پہنچ گئی، اب ملک کے بہترین مفاد میں ان سرکاری اداروں کی نجکاری ہی واحد حل ہے خاصا چشم کشا ہے ۔ وقت کی کمی کے باعث مردم شماری کرانے یا نہ کرانے کے معاملے پر مشاورت کا نہ ہونا افسوس ناک ہے ،مردم شماری میں التوا ملکی مفاد میں نہیں، اقتصادی ترقی کے لیے مردم شماری ،خانہ شماری،اور افرادی قوت کے درست اعداد وشمارکی دستیابی قومی ضرورت ہے اس لیے آیندہ اجلاس میں اس معاملہ پر مثبت اتفاق رائے پیدا کیا جائے ۔ تاہم مشترکہ مفادات کونسل نے پاکستان انجنیئرنگ کونسل کے ترمیمی بل ، آغاز حقوق بلوچستان پروگرام کے تحت تیل و گیس کے منصوبہ جات، پی پی ایل اور سوئی سدرن گیس جیسے اداروں کے 20فیصد شیئرز حکومت بلوچستان کے لیے خریداری، صوبوں کے ذمے واجب الادا بجلی کے واجبات کی ادائیگی کے لیے طریقہ کار ، پی ٹی سی ایل کے اثاثہ جات (بشمول پراپرٹی) کی اس کی خریداروں کو منتقلی ، توانائی پیدا کرنے والی کمپنیوں ’جنکوز‘ اور تقسیم کار کمپنیوں ’ڈسکوز‘ کی نجکاری سے متعلق2011 کی پالیسی جاری رکھنے ، تھرکول منصوبے کے لیے ’ساورن گارنٹی‘ کے اجرأ اور قومی توانائی پالیسی 2013-18 کی منظوری سمیت اہم فیصلے کر کے معاشی ترقی میں تسلسل کی یقین دہانی کرا دی ۔

اجلاس میں چاروں وزرائے اعلیٰ اور وزیر خزانہ اسحاق ڈار کے علاوہ صوبائی وزرائے خزانہ اور مشیر خزانہ نے شرکت کی۔ تھرکول پاور پراجیکٹ کے لیے وفاق کی ضمانت کی منظوری دیتے ہوئے وزیراعظم نے کہا کہ تھرکول پاور پراجیکٹ ایک اہم قومی منصوبہ ہے، اس کی تکمیل سے سستے داموں بجلی کی ضرورت پوری ہوگی ۔دریں اثنا وزیرمملکت برائے پانی و بجلی عابد شیر علی نے کہا ہے کہ بجلی چور قومی مجرم ہیں ان کے خلاف آپریشن جاری رہے گا۔ بجلی چوروں کوآئین و قانون کے مطابق سزائیں دیںگے۔ وفاقی وزیر خزانہ اسحاق ڈار نے کہا ہے کہ ہم نے اپنے مختصر عرصہ میں آئی ایم ایف سمیت دیگر مالیاتی اداروں سے جو قرضہ حاصل کیا ہے اس کو بجلی کی پیداوار و دیگر اداروں کی حالت کو بہتر بنانے پر خرچ کیا ہے جس سے ہماری ملکی معیشت بہتر ہوئی ہے ۔ بہر حال غیر ملکی مالیاتی اداروں، بینکوں اور ملکی بینکوں سے لیے گئے اربوں قرضے کے بوجھ تلی دبی معیشت کی قومی وسائل سے دائمی بہتری کا معاشی ماڈل پیش ہونا چاہیے، ایشین ٹائیگر نہ سہی پاکستان کم از کم خود انحصاری کی طرف جاتا نظر آئے تو بھی باعث اطمینان ہوگا ۔خود کفالت اور کشکول شکنی کی حقیقت حکمرانوں کو مد نظر رکھنی چاہیے ۔ ورنہ قرض کی مے پینے کی مالیاتی عادت کبھی نہیں چھوٹ سکتی ۔دوسری طرف اختیارات کے غلط استعمال، وفاقی و صوبائی اداروں میں تناؤ، رنجش، فرض شناسی کے فقدان اور فیصلوں کے بحران یا غیر دانشمندانہ اقدامات سے پیداشدہ افراتفری اور بدانتظامی کا سدباب بھی ہونا ضروری ہے جس کے تماشے آئے دن پرنٹ اور الیکٹرانک میڈیا کی زینت بنتے نظر آتے ہیں۔کرائے کا بجلی گھرلانے والی ترک کمپنی نے بین الاقوامی عدالت میںپاکستان کے خلاف 2.1 ارب ڈالرہرجانے کا دعویٰ دائرکر دیا ہے۔

مشترکہ مفادات کونسل کے اجلاس میں وزیراعلیٰ سندھ سید قائم علی شاہ نے زیربحث آنے والے نکات پر تمام دیگر وزرائے اعلیٰ سے زیادہ اعتراضات اٹھائے جب کہ خیبر پختونخوا کے وزیراعلیٰ پرویز خٹک غیر متوقع طور پر شہباز شریف کے بعد سب سے کم اعتراض کرنے والے وزیراعلیٰ ثابت ہوئے۔ وزیراعلیٰ سندھ سید قائم علی شاہ کی مزاحمت کے باعث راولپنڈی، اسلام آباد کے لیے تجویز کی گئی نئی واٹر سپلائی اسکیم کی منظوری موخر کردی گئی،وزیراعلیٰ سندھ سید قائم علی شاہ نے لاکھڑاکول پاور جنریشن کمپنی کی نجکاری پر بھی شدید اعتراض کیا ، وزیراعلیٰ بلوچستان ڈاکٹر عبدالمالک کا مطالبہ تھا کہ18ویں ترمیم کے بعد بلوچستان کو آغاز حقوق بلوچستان کے تحت پی پی ایل اور سوئی سدرن گیس کمپنی جیسے انرجی سے متعلق اداروں کے20فیصد کے بجائے50فیصد تک شیئرز خریدنے کا اختیار دیا جائے جس پر وزیراعظم نوازشریف کو بالٓاخر وزیر خزانہ اسحٰق ڈار کو ہدایت کرنا پڑی کہ وہ ڈاکٹر مالک سے اس بارے تفصیلی میٹنگ کریں جب کہ وزیر مملکت برائے پاور بجلی عابد شیر علی کی جانب سے صوبہ خیبرپختونخوا اور صوبہ سندھ کے بعض سیاسی رہنماؤں اور اراکین پارلیمنٹ کے بجلی چوری میں ملوث ہونے یا چوروں کی پشت پناہی کے الزامات کے حوالے سے وزیراعلیٰ خیبرپختونخوا پرویزخٹک اور وزیراعلیٰ سندھ سید قائم شاہ غیر متوقع طور پر خاموش رہے.

ادھر پشاور ہائیکورٹ نے فیول ایڈجسٹمنٹ سرچارج کیس کا تفصیلی فیصلہ جاری کر دیا جس کے مطابق نیپراکا پورے ملک کے لیے بجلی کے یکساں نرخ مقرر کرنے کا اختیار اور پختونخوا کے صارفین سے تھرمل بجلی کے نرخ وصول کرنے کے اقدام کو غیر قانونی اور غیرآئینی قرار دیا ہے جب کہ یوٹیلٹی اسٹورز کو کمپیوٹرائز کرنے کے پروگرام کی خریداری کے معاملے پر وفاقی وزیرصنعت و پیداوار غلام مرتضیٰ جتوئی اور ایم ڈی یوٹیلٹی اسٹورز مرتضیٰ خاقان کے درمیان چپقلش کی اطلاع ہے ،کہا جاتا ہے کہ وفاقی وزیر انٹرپرائز ریسورس پلاننگ (ای آر پی)سسٹم بیرون ملک سے لینے پر تلے ہوئے ہیں جب کہ ایم ڈی نے سسٹم بیرون ملک سے لینے سے انکارکر دیا ۔ یہ چند مثالیں ہیں لہٰذا اقتصادی شفافیت کے لیے مربوط معاشی میکنزم وقت کا تقاضہ ہے۔ کسی لابی ،آئل مافیا،لینڈ مافیا،ڈرگ مافیا،گن مافیا اور ان کے کارندوں کو ملکی معیشت کو یرغمال بنانے کی اجازت نہیں ملنی چاہیے اور یہ کام اسی صورت میں ہوسکتا ہے کہ کرپشن، بد انتظامی ، اقربہ پروری اور دوست نوازی سے پاک معیشت کواپنی شرح نمو دکھانے کا موقع مل سکے۔

ایکسپریسس اردو

اللہ کے آخری نبیؐ کا آخری خطبہ اللہ کے آخری دین کا آخری خلاصہ تھا‘ یہ خطبہ دین بھی تھا‘ دنیا بھی ‘ معاشرت بھی ‘ آخرت بھی اور انسانیت بھی ۔ یہ خطبہ بنیادی طور پر انسان‘ انسانیت اور انسانی حقوق کا چارٹر تھا اور یہ آج بھی چارٹر ہے‘ میرا ایمان ہے‘ دنیا کا کوئی انسان اس وقت تک اچھا انسان اور دنیا کا کوئی معاشرہ اس وقت تک اچھا معاشرہ نہیں بن سکتا جب تک یہ اس چارٹر پر عمل نہیں کرتا کیونکہ یہ چارٹر انسان اور انسانیت دونوں کا جوہر ہے‘ یہ دونوں کا ایٹم ‘ دونوں کی روح ہے‘ میں اس خطبے کے چند نقطے آپ کے سامنے پیش کرتا ہوں اور اس کے بعد اسلامی جمہوریہ پاکستان کے اٹھارہ کروڑ لوگوں اور دین کے دو کروڑ سپہ سالاروں سے ایک سوال کرتا ہوں‘ کیا یہ ملک‘ کیا آپ اور آپ کی تنظیمیں اس چارٹر پر پورا اترتی ہیں‘ اگر ہاں تو میں آپ کے ہاتھ پر بیعت کرنے کے لیے تیار ہوں اور اگر نہیں تو پھر مہربانی کر کے پارسائی کے دعوے بند کر دیجیے کیونکہ آپ اور میں دونوں نبی اکرمؐ کی حکم عدولی کے گناہ گار ہیں۔

میرے رسول ﷺ نے 10 ہجری 9 ذوالحجہ کے دن عرفات کے میدان میں کھڑے ہو کر فرمایا ’’ اے لوگو! تمہارے خون و مال اور عزتیں ہمیشہ کے لیے ایک دوسرے پر قطعاً حرام کر دی گئیں‘ان چیزوں کی اہمیت ایسی ہے جیسی تمہارے اس دن کی اور مبارک مہینہ (ذوالحجہ) کی خاص کر اس شہر میں ہے‘ تم سب اللہ کے حضور پیش ہو گے اور وہ تم سے تمہارے اعمال کی باز پرس فرمائے گا‘‘۔ آپ اپنے گریبان میں جھانکیے اور جواب دیجیے‘ کیا ہمارے ہاتھ سے دوسرے مسلمانوں کی جان‘ مال اور عزت محفوظ ہے؟ کیا ہم اپنے محترم مہینوں اور دنوں کا احترام کرتے ہیں‘ اگر ہاں تو پھر مسجدوں‘ امام بارگاہوں اور قبرستانوں میں بم پھاڑنے والے کون ہیں اور اسکولوں پر خودکش حملے کیوں ہو رہے ہیں؟ اور محرم اور ربیع الاول کے مہینوں میں ڈبل سواری پر پابندی کیوں لگتی ہے اور موبائل سروس کیوں معطل ہوتی ہے؟ فرمایا ’’عورتوں کے بارے میں اللہ سے ڈرتے رہو‘ تم نے انھیں اللہ کی امان کے ساتھ نکاح میں لیا‘ یہ تمہارے پاس اللہ کی امانت ہیں‘ تم رواج کے مطابق ان کے لباس اور خوراک کا بندوبست کرو‘ اچھے سلوک کی تاکید کرو کیونکہ یہ تمہارے زیر دست ہیں‘‘ آپ اپنے گریبانوں میں جھانکیے اور بتایئے‘ کیا خواتین بالخصوص بیگمات کے ساتھ ہمارا رویہ اس معیار پر پورا اترتا ہے؟ اگر ہاں تو پھر اس معاشرے میں ونی اور سورا کی رسمیں کیوں ہیں؟ عورتوں کے منہ پر تیزاب پھینکنے والے لوگ کون ہیں؟ بیویوں پر انسانیت سوز تشدد کون کر رہا ہے؟ اور اس معاشرے کی عورت کو مومن عورت کا حق کون نہیں دے رہا؟۔

فرمایا ’’ ہر مسلمان دوسرے مسلمان کا بھائی ہے‘ کسی کے لیے جائز نہیں‘ یہ اپنے بھائی کے مال سے کوئی چیز اس کی اجازت کے بغیر لے‘ جو کام کرو اللہ کی رضا کے لیے کرو‘ حاکم وقت کو از خیر خواہی نصیحت کرنا‘ مسلمانوں کی جماعت میں شامل رہنا‘ غلام کو وہی کھلاؤ جو خود کھاتے ہو‘ وہی پہناؤ جو تم خود پہنتے ہو‘ اس سے غلطی ہو جائے تو اسے سزا نہ دینا اور تین بار فرمایا‘ میں تمہیں پڑوسی کے بارے میں نصیحت کرتا ہوں‘ پھر فرمایا وارث کے لیے جائیداد میں حصہ ہے‘ عربی کو عجمی پر کوئی فضیلت ہے اور نہ ہی سرخ رنگ والے کو کالے پر اور اللہ کی نظر میں صرف متقی مکرم ہیں‘‘۔ آپ گریبان میں جھانکیے اور بتایئے‘ کیا ہم دوسرے مسلمانوں کو اپنا بھائی سمجھ رہے ہیں‘ کیا ہم خود مسلمانوں کی جماعت میں رہتے ہیں اور کیا ہم دوسروں کو بھی رہنے دیتے ہیں؟ کیا ہمارے ماتحت‘ ہمارے ملازمین بھی ہماری طرح خوشحال ہیں؟ کیا ہمارے پڑوسی ہم سے خوش ہیں؟ کیا ہم اپنے تمام وارثوں کو حصہ دے رہے ہیں اور کیا اس معاشرے میں گورا اور کالا برابر ہیں؟ اگر ہاں تو پھر مسلمانوں کو کافر قرار دینے والے مسلمان کون ہیں‘ ہمارے ملازمین ہڑتالیں کیوں کر رہے ہیں؟ عدالتوں میں وراثت کے لاکھوں مقدمے کیوں چل رہے ہیں؟ ہمارے ہمسائے فون کر کے پولیس کو کیوں بلا لیتے ہیں؟ ‘ لوگ رنگ گورا کرنے کی کریمیں کیوں استعمال کرتے ہیں اور ہم اپنے ناموں کے ساتھ اپنے بلند مرتبت قبیلوں‘ خاندانوں اور مکاتب فکر کے حوالے کیوں لکھتے ہیں اور ملک کے علماء کرام اس دوڑ میں عام لوگوں سے آگے کیوں ہیں؟ یہ لوگ تقویٰ کے بجائے نقوی‘ بریلوی‘ نقش بندی‘ قادری‘ مشہدی‘ نجفی اور دیوبندی کو اپنی دستار کیوں بناتے ہیں؟بتائیے جواب دیجیے۔ فرمایا ’’ میرے بعد دشمن بن کر ایک دوسرے کو قتل نہ کرنا‘ میں تمہارے پاس دو چیزیں چھوڑ کر جا رہا ہوں‘ یہ تھامے رکھو گے تو کبھی نہیں بھٹکو گے‘ اللہ کی کتاب اور میری سنت‘‘۔

آپ اپنے گریبانوں میں جھانکیے اور جواب دیجیے‘ کیا ہم ایک دوسرے کے دشمن بن کر ایک دوسرے کو قتل نہیں کر رہے‘ کیا امت آج تک قرآن مجید اور سنت پر متفق ہوئی؟ کیا ہم چودہ سو سال سے قرآن مجید کے مطالب پر نہیں لڑ رہے؟ کیا ہم سنت میں سے فرقے نہیں نکال رہے ہیں؟ کیا یہ سچ نہیں؟ اللہ کے رسولؐ نے ہمارے لیے صرف کتاب اور سنت چھوڑی تھی لیکن ہم نے ان میں سنی‘ شیعہ‘ اہلحدیث اور بریلوی کو بھی شامل کر دیا‘ اللہ تعالیٰ اور اس کے رسولؐ کی مسجد صرف مسجد تھی لیکن ہم نے اسے سنیوں‘ وہابیوں‘ شیعوں اور بریلویوں کی مسجد بنا دیا‘ ہم تو آج تک اس بات پر لڑ رہے ہیں کہ رسول اللہ ﷺ اور ان کے صحابہؓ دنیا سے رخصتی کے باوجود زندہ ہیں یا مکمل طور پر پردہ فرما چکے ہیں‘ ہمارے نفاق کی حالت تو یہ ہے‘ ہم آج تک داڑھی اور مسواک کا سائز طے کررہے ہیں‘ ہمارے ٹخنے نماز کے دوران ننگے ہونے چاہئیں یا ڈھکے ہوئے اور پردے کے لیے برقعہ لازمی ہے یا اسکارف سے بھی کام چل جائے گا ہم آج تک یہ فیصلہ نہیں کر سکے‘ ہم آج تک نماز کے دوران دونوں پاؤں کے فاصلے کا فیصلہ نہیں کر سکے‘ ہم سے شلوار اور پتلون کے مقدر کا فیصلہ نہیں ہو سکا‘ ہم نماز کے دوران آمین کی آواز کی پچ متعین نہیں کر سکے‘ ہم یہ فیصلہ نہیں کر سکے صرف دینی علم کافی ہے یا پھر اس میں سائنس کی گنجائش بھی موجود ہے۔

اللہ کے رسولؐ نے اپنے آخری خطبے میں فرمایا تھا ’’ قتل نہ کرنا اور قرآن اورسنت کو تھامے رکھنا‘‘ لیکن ہم نے قرآن اور سنت کو اپنے مسلمان بھائیوں کے قتل کی وجہ بنا لیا‘ کیا یہ اسلام ہے؟ کیا یہ شریعت ہے؟ اگر نہیں تو پھر مساجد کو فرقہ واریت‘ سنت اور قرآن کو اختلافات کا ذریعہ بنانے والے لوگ کون ہیں؟ آپ مسلمان ہیں اور عالم دین ہیں تو پہلے تقویٰ کو فضیلت کی بنیاد بنائیے‘ گورے اور کالے اور عربی اور عجمی کی تفریق ختم کیجیے‘ اپنے آپ کو اپنے باپ کے سوا دوسروں سے منسوب کرنا بند کیجیے‘ وارثوں کو پورا حصہ دیجیے اور وراثت میں اپنے حق سے زیادہ وصول کرنا بند کیجیے‘ مسجدوں اور درگاہوں کو وراثت بنانا بند کیجیے‘ پڑوسی سے وہ حسن سلوک کیجیے جس کا رسول اللہ ﷺ نے حکم دیا تھا‘ ملازموں کو معاف کرنا شروع کیجیے‘ اللہ کی رضا کو اپنے اعمال کا مرکز بنائیے‘ مسلمانوں کو دائرہ اسلام سے خارج کرنا بند کیجیے‘ بیویوں کے ساتھ حسن سلوک کیجیے اور اللہ کے رسولؐ نے آخری خطبے میں چار مہینوںکو احترام کے مہینے قرار دیا تھا‘ کم از کم ان مہینوں میں نفاق اور نفرت کا کاروبار بند کیجیے‘ ان مہینوں کو اتنا احترام دے دیجیے کہ ریاست کو موبائل فون بند کرنا پڑیں‘ ایمرجنسی لگانا پڑے‘ پولیس تعینات کرنا پڑے اور نہ ہی ڈبل سواری پر پابندی لگانا پڑے اور مسلمانوں کی جان‘ مال اور عزت کو اپنے اوپر حرام قرار دے دیجیے اور اس کے بعد میرے جیسے گناہ گاروں کی اصلاح فرمایئے‘ ہم جیسے دنیادار آپ کے سائے میں بیٹھنا عبادت سمجھیں گے۔

مجھے افسوس سے کہنا پڑتا ہے‘ اللہ کے آخری نبیؐ کا آخری خطبہ دنیا کا عظیم چارٹر تھا لیکن ہم لوگ اس پورے چارٹر کو اپنی ذات اور اپنے معاشرے پر نافذ کرنے کے بجائے اس میں سے صرف سود کا حصہ اٹھاتے ہیں اور ریاست کو حکم دیتے ہیں ’’آپ فوری طور پر بلاسود بینکاری شروع کردیں‘‘ سود اسلام میں حرام ہے اور ہم جب تک اسے حرام نہیں سمجھتے ہمارا ایمان مکمل نہیں ہو سکتا لیکن کیا عورتوں کے منہ پر تیزاب پھینکنا‘ مزارعوں کو غلام بنا کر رکھنا‘ خواتین کی شادی قرآن مجید سے کر دینا‘ معصوم بچیاں ونی کر دینا‘ نسل اور خاندان کی بنیاد پر انسانوں کو اچھا یا برا سمجھنا‘ مسجد‘ درگاہ اور مزار کو وراثت بنا لینا‘ کلمہ گو مسلمانوں کو کافر قرار دینا‘ عبادت کو اپنی اہلیت سمجھ لینا اور دوسروں کے قتل کے فتوے جاری کر دینا‘ کیا یہ حلال ہے؟ کیا یہ جائز ہے؟ ہمارے رسولؐ نے ایک انسان کے قتل کو پوری انسانیت کا قتل قرار دیا تھا لیکن ہم پچاس پچاس ہزار مرتبہ انسانیت کے قتل کے بعد بھی خود کو مسلمان کہتے ہیں‘ اللہ کے رسولؐ نے حضرت ابوسفیانؓ کے گھر میں پناہ لینے والوں کو پناہ دی تھی لیکن ہم مسجدوں میں بیٹھے مسلمانوں کو پناہ نہیں دیتے‘ اللہ کے رسولؐ نے آخری خطبے میں قتل معاف کر دیے تھے اور ان قتلوں میں ربیعہ بن حارث کے دودھ پیتے بیٹے کا قتل بھی شامل تھا مگر ہم صرف شناختی کارڈ دیکھ کر دوسروں کو قتل کر دیتے ہیں‘ کیا یہ شریعت ہے اور کیا ہم اس ملک میں یہ شریعت نافذ کرنا چاہتے ہیں؟ خدا کو مانیں اسلام صرف تلوار‘ کوڑا اور پتھر نہیں تھا‘ یہ صرف داڑھی‘ تسبیح‘ سجدہ اور روزہ بھی نہیں تھا‘ یہ برداشت‘ انکسار‘ حلیمی‘ شائستگی‘ توازن‘ فرائض‘ عدل اور احترام کا مذہب تھا لیکن ہم نے اس سے عدل‘ فرض‘ توازن‘ شائستگی‘ حلم‘ انکسار اور برداشت نکال دی‘ہم نے انسانیت کا چارٹر الماری میں بند کر دیا اور پتھر‘ کوڑے اور تلوار میز پر رکھ دیے اور ساتھ ہی ہم حیرت سے ایک دوسرے سے پوچھتے ہیں ’’ دنیا ہماری عزت کیوں نہیں کرتی‘‘ ہم کس قدر بے وقوف ہیں‘ ہم یہ تک نہیں جانتے ہم نے جب اپنے رسولؐ کے احکامات کی عزت نہیں کی تو دنیا ہماری عزت کیوں کرے گی؟

ہر سال فروری کا مہینہ شروع ہوتے ہی موبائل کمپنیوں کی طرف سے ٹیکسٹ میسج آنا شروع ہو جاتے ہیں کہ اپنے چاہنے والوں کو پیار بھرا پیغام بھیج دیجئے، الیکٹرانک میڈیا پر اس دن کے حوالے سے خصوصی پروگرام نشر ہوتے ہیں، ڈرامے اور ٹیلی فلمیں دکھائی جاتی ہیں۔ موبائل کمپنیاں مختلف ترغیبات کے ذریعے اپنے صارفین کے بیلنس پر ہاتھ صاف کرتی ہیں جبکہ ٹی وی چینل والوں کو اپنے ناظرین کو بے وقوف بنانا کا ایک اور موقع مل جاتا ہے۔ ہر سال چودہ فروری کو ایک پادری ویلن ٹائن کے بدکاری کی سزا میں مارے جانے کی یاد میں دنیا بھر کے جنسی بے راہ لوگ ’’یوم محبت‘‘ مناتے ہیں۔ لادین مغرب کی اندھی تقلید نے ہماری عقلوں پر جالے بُن دیئے ہیں۔ پچھلے برسوں سے ویلن ٹائن ڈے جیسے مغرب کے حیاباختہ دِنوں اور تہواروں کو مسلم ممالک میں جس جوش و خروش سے منایا جاتا ہے، اس سے ہماری ثقافتی اقدار کو سخت خطرہ لاحق ہو گیا ہے۔ بالخصوص ’’ویلن ٹائن ڈے‘‘ کے موقع پر آوارگی، اوباشی، بے حیائی، بے ہودگی اور فحاشی جس طرح اپنے عروج پر ہوی ہے، وہ ہماری اخلاقی اور تہذیبی اقدار و روایات کے لیے کی طرح بھی موت سے کم نہیں۔ہم کسی اور میدان میں ترقی کریں یا نہ کریں مغربی تہذیب کی پیروی میں سب سے آگے ہیں۔

 نجانے کیا بات ہے کہ مغرب کی پیروی میں کیوں ہم اتنے آگے نکل گئے ہیں کہ اسی کو اپنا اوڑھنا بچھونا بنالیا ہے۔ اس پیروی کو ہم نے اپنا دین و ایمان بنا رکھا ہے جبکہ جو اصل دین ہے اس کو فراموش کیے بیٹھے ہیں۔ اپنے آپ کو ماڈرن ظاہر کرنے کے چکر میں ہم اپنی اصلیت بھولتے جا رہے ہیں۔بظاہر مسلمان کہلاتے ہیں لیکن مسلمانوں والی کوئی بات ہم میں نہیں پائی جاتی۔ خرافات کو اپنانے میں ہم اپنی مثال آپ ہیں، دین میں بدعتوں کو رواج دینا ہو تب بھی ہم نمبرون ہیں، اسی کی ایک مثال ’’ویلن ٹائن ڈے‘‘ ہے جس کو منانے میں ہم ان سے بھی آگے نکل گئے جہاں سے اس روایت کا آغاز ہوا تھا۔ دینِ اسلام ہمیں اللہ تعالی، رسول اللہ اور پوری انسانیت سے محبت کا درس دیتا ہے، جس کے اظہار کے لیے ہمارے پاس سال کا ہر دن اور ہر لمحہ موجود ہے اور اس کا اظہار ’’ویلن ٹائن ڈے‘‘ کے موقع پر سرخ پھولوں اور تحائف سے نہیں، بلکہ احکام الٰہی اور اسوہ رسولؐ پر عمل کرنے سے ہوتا ہے۔ مسلمانوں کو ویسے بھی یہ دن نہیں منانا چاہئے کیونکہ اس میں غیر مذہب کی تقلید ہے، جسے اسلام سختی سے منع کرتا ہے۔ اس وقت حکومت اور عوام دونوں ایک ہی ڈگر پر چل نکلے ہیں، جس کا نتیجہ اخلاقی بگاڑ کے سوا کچھ بھی نہیں ہے۔ہمیں یہ بات اچھی طرح سمجھ لینی چاہیے کہ اس طرح کے لایعنی تہوار وہ لوگ مناتے ہیں، جن کی اپنی کوئی تہذیب یا ثقافت نہیں ہوتی۔ الحمد اللہ ہماری اپنی جداگانہ خوب صورت تہذیب اور ثقافت ہے۔ ویلن ٹائن ڈے جہاں ایک غیر مذہب کی ثقافت کو رواج دینے کی چال ہے وہاں نوجوان نسل کو بے حیائی کی طرف دھکیلنے کی ایک سازش بھی ہے۔

اسلام ہی سچا دین ہے اور مسلمان قوم ہی دنیا کی دیگر اقوام سے ہر لحاظ سے افضل و برتر ہے لیکن افسوس کہ ہماری قوم کے اکثر افراد غیر مسلموں کی تقلید کرکے خود کو کم تر ثابت کر رہے ہیں۔ہم یہ کیوں بھول جاتے ہیں کہ ہم کسی مذہب کے پیروکار، کسی نبی کی اُمت اور کسی قوم سے وابستہ ہیں۔ ہمیں ہر معاملے میں صرف اور صرف اسلامی عقائد اور اسلامی تعلیمات کو پیش نظر رکھنا چاہیے اور اسلامی تہواروں کو خاص اسلامی طریقے سے منانا چاہیے۔یہی ہمارے لیے باعث فخر ہے، نہ کہ بسنت اور ویلن ٹائن جیسے غیر اسلامی تہواروں کو منانا اور فروغ دینا۔ ہمیں اپنا امتیاز، اپنی پہچان اور اپنا وقار قائم رکھنے کے لیے ہر قسم کے غیر اسلامی تہواروں کو منانے سے گریز کرنا چاہیے۔ اگر اظہارِ محبت ہی کرنا ہے تو کسی مخصوص دن نہیں بلکہ ہر دن اپنے ماں باپ سے کیجیے، بچوں سے کیجیے، بہن بھائیوں سے کیجیے، اساتذہ سے کیجیے، ہسپتالوں میں پڑے بیماروں سے کیجیے۔محبت صرف یہی نہیں جس کا اظہار دو غیر محرم مخالف جنسوں کے درمیان ہو، بلکہ محبت کے اور بھی بہت سے رُخ ہیں، کبھی اس طرف بھی سوچئے۔ 

مغربی دنیا گزشتہ تین سو سال سے انسان کی آزادی کے ترانے گا رہی ہے اور اس کا اصرار ہے کہ آزادی اس کی سب سے بڑی قدر ہے۔ لیکن حقیقت یہ ہے کہ آزادی مغربی دنیا کے حوالے سے سب سے بڑا دھوکا ثابت ہوئی ہے۔ مغربی دنیا میں جب صنعتی اور سیاسی انقلابات رونما ہورہے تھے ٹھیک اُسی زمانے میں اہلِ مغرب دوسری اقوام کو غلام بناکر نوآبادیاتی دور کی ابتداء کررہے تھے۔ وہ کہہ رہے تھے ہم سفید فام ہیں، ہم مہذب ہیں اور ہم غیر مہذب لوگوں کو تہذیب سکھانے نکلے ہیں۔ لیکن تہذیب انسانوں کو آزاد رکھ کر سکھائی جاسکتی ہے، انہیں غلام بنا کر نہیں… اس لیے کہ غلامی تہذیب کے ہر تصور کی نفی ہے۔ ویسے بھی اہلِ مغرب نے جن اقوام کو غلام بنایا وہ مغربی دنیا کے لوگوں سے زیادہ مہذب تھیں۔ اس کی وجہ یہ ہے کہ علم اور تہذیب کی روایت مغرب سے مشرق کی طرف نہیں آئی تھی بلکہ مشرق سے مغرب کی طرف گئی تھی۔ اہلِ مغرب اگر عیسائی ہیں تو عیسائیت مغرب میں پیدا نہیںہوئی تھی۔ اہلِ مغرب کے پاس اگر فلسفہ اور سائنس تھی تو یہ چیزیں بھی انہیں مسلمانوں سے ملی تھیں… اور اسلام کا سورج مغرب میں نہیں مشرق میں طلوع ہوا تھا۔ لیکن مغربی دنیا صرف دوسری اقوام کی آزادی ہی کے درپے نہیں تھی، مغربی معاشروں میں سفید فام اور سیاہ فام کی تفریق آج بھی موجود ہے اور یہ بہت پرانی بات نہیں ہے کہ مغربی اقوام بڑے پیمانے پر سیاہ فام غلاموں کا کاروبار کیا کرتی تھیں اور ان کے شہروں کے ریستورانوں کے دروازوں پر لکھا ہوتا تھا کہ یہاں سیاہ فاموں اور کتوں کا داخلہ ممنوع ہے۔

کمیونزم نے 70 سال تک مغرب میں آزادی کے لیے ایک پردے کا کام کیا۔ اس زمانے میں مغرب کے ’’آزاد‘‘ اور سوویت یونین کے ’’پابند‘‘ معاشرے کے حوالے سے ایک لطیفہ بہت مشہور تھا اور وہ یہ کہ امریکہ اور سوویت یونین کے دو کتوں کی آپس میں ملاقات ہوئی تو امریکہ کے کتے نے سوویت کتے کی صحت کی بہت تعریف کی۔ یہ سن کر سوویت کتے نے کہا کہ ہمارے یہاں غذا تو وافر ہے مگر مسئلہ یہ ہے کہ ہمارے یہاں بھونکنے کی آزادی نہیں۔ اس کے بعد سوویت کتے نے امریکی کتے سے کہا کہ تمہاری صحت کچھ زیادہ اچھی نہیں۔ امریکی کتے نے کہا کہ بے شک مجھے غذا تو اچھی نہیں ملتی مگر بھونکنے کی پوری آزادی ہے۔ لیکن حقیقت یہ ہے کہ جدید مغرب کی سب سے بڑی علامت امریکہ میں بھونکنے کی آزادی بھی صرف اُن لوگوں کو تھی جو ’’کاٹتے‘‘ نہیں تھے۔ یعنی جن کی باتوں میں معنی، زور اور کاٹ نہیں تھی۔ جن کے پاس دلائل و براہین نہیں تھے۔ ورنہ امریکہ کی تاریخ ہمارے سامنے ہے۔ ایزراپائونڈ امریکی تھا اور اسے 20 ویں صدی کا سب سے بڑا انگریزی شاعر اور نقاد کہا گیا ہے۔ لیکن اس نے اٹلی جاکر مسولینی کی حمایت کی اور امریکی نظام پر تنقید کی تھی اس لیے امریکہ کی سلامتی سے متعلق ادارے اس کے پیچھے پڑ گئے، یہاں تک کہ اس کے شاگرد اور متاثرین اس کی جان کو خطرے میں محسوس کرنے لگے، چنانچہ انہوں نے ایزرا پائونڈ کو نفسیاتی مریض باور کراکے نفسیاتی اسپتال میں داخل کرادیا اور وہ کئی سال اسپتال میں داخل رہا۔ لیکن یہ صرف ایزراپائونڈ کا مسئلہ نہیں۔ 1960ء کی دہائی میں مارٹن لوتھر کنگ امریکہ میں شہری آزادیوں اور سیاہ فاموں کے حقوق کی علامت بن کر ابھرے تو ایف بی آئی ان کے پیچھے لگ گئی۔ ان کے ٹیلی فون ٹیپ کیے جانے لگے۔ یہ زیادہ پرانی بات نہیں کہ امریکہ کی ممتاز دانشور سوسن سونٹیگ نے کہا کہ امریکہ کی بنیاد نسل کشی پر رکھی ہوئی ہے تو ان کے خلاف طوفان کھڑا ہوگیا اور انہیں غدار قرار دیا گیا۔ اس سلسلے کی تازہ ترین مثال نوم چومسکی ہیں۔ وہ یہودی اور امریکی ہیں لیکن وہ امریکہ کو دنیا کی سب سے بدمعاش ریاست کہتے ہیں اور امریکہ کی نام نہاد ’’وار آن ٹیرر‘‘ کے ناقد ہیں۔ چنانچہ ان کی نگرانی کی جاتی ہے اور انہیں امریکہ میں اجنبی بنادیا گیا ہے۔ اب وہ امریکہ میں درس و تدریس تک محدود ہیں اور امریکہ کے ممتاز ابلاغی ذرائع نوم چومسکی کو منہ نہیں لگاتے، حالانکہ نوم چومسکی دنیا کے دو تین اہم ماہرین لسانیات میں سے ایک ہیں۔ لیکن ایڈورڈ اسنوڈن نے مغرب کے تصورِ آزادی کے پورے نظام کی اینٹ سے اینٹ بجادی ہے۔

ایڈورڈ اسنوڈن کے انکشافات سے معلوم ہوا ہے کہ امریکہ کے خفیہ ادارے قومی سلامتی کے نام پر روزانہ اربوں ٹیلی فون کالزسن رہے ہیں۔ ٹیلی فونز پر روزانہ 20کروڑ سے زیادہ پیغامات پڑھ رہے ہیں۔ سوشل میڈیا پر لاکھوں گفتگوئیں ملاحظہ کررہے ہیں۔ اہم بات یہ ہے کہ ان کی نگرانی کا مرکز صرف ’’ممکنہ دہشت گرد‘‘ نہیں بلکہ وہ عام امریکیوں پر بھی نظر رکھے ہوئے ہیں۔ وہ یورپ کے اہم رہنمائوں اور یورپی پارلیمنٹ کی بھی نگرانی کررہے ہیں۔ اس سے معلوم ہوا کہ امریکہ کے تصورِ آزادی کے دائرے میں پوری دنیا ہی مشتبہ ہے۔ اس دائرے میں نہ کوئی قابلِ احترام انسان ہے، نہ قابلِ احترام امریکی، نہ قابلِ احترام یورپی۔ اس سلسلے میں امریکہ پر زبردست تنقید ہوئی تو بارک اوباما نے ماضی میں پناہ لینے کی کوشش کی اور کہا کہ امریکہ کی آزادی کی جدوجہد کے ایک مرحلے پر امریکہ کا ایک شہری پال ریوٹر اور کئی اور افراد رات کے وقت سڑکوں پر پہرہ دیتے تھے اور جیسے ہی انہیں معلوم ہوتا تھا کہ قابض برطانوی فوجی امریکہ کی جنگِ آزادی لڑنے والوں کے خلاف کچھ کرنے والے ہیں وہ اس کی اطلاع متعلقہ افراد کو دیتے تھے۔ اوباما کے اس تبصرے پر بعض امریکیوں نے انہیں یاد دلایا کہ ہماری تاریخ کا زیادہ اہم اور نمائندہ واقعہ یہ ہے کہ امریکی کانگریس نے 1774ء میں اُس وقت کے برطانوی بادشاہ جارج سوئم سے اس بات پر سخت احتجاج کیا تھا کہ برطانوی فوجیوں کو امریکیوں کے گھروں میں گھس کر تلاشی لینے اور کسی بھی چیز کو قبضے میں لے لینے کے غیر معمولی اختیارات دے دیے گئے ہیں۔ اس سلسلے کی مزیدار ترین بات یہ ہے کہ امریکہ کے خفیہ ادارے ایک مثال بھی ایسی پیش نہیں کرسکے ہیں جس میں انہوں نے خفیہ نگرانی کے ذریعے امریکہ کے خلاف کسی اقدام کا پتا لگایا ہو اور اس کی روک تھام کی ہو۔ امریکہ کے خفیہ نگرانی کے پروگرام پر یورپی رہنما بھی چیخے تو مغرب کی آزادی کے دھوکے کا ایک اور پہلو سامنے آیا۔ امریکہ کے صدر بارک اوباما نے زیربحث مسئلے پر تقریر کرتے ہوئے فرمایا کہ نیشنل سیکورٹی ایجنسی کو کسی شخص کے فون ٹیپ کرنے سے پہلے خفیہ نگرانی کی متعلقہ عدالت سے اس کی اجازت لینی چاہیے۔ تاہم اوباما کی اس تقریر کے حوالے سے ناقدین نے انہیں یاد دلایا کہ مذکورہ عدالت ایک خفیہ عدالت ہے اور اس نے آج تک نگرانی کے سلسلے میں نیشنل سیکورٹی ایجنسی کی ایک درخواست بھی مسترد نہیں کی ہے۔ امریکہ کی خفیہ نگرانی کے حوالے سے طوفان برپا ہوا تو امریکہ کے صدر نے نیشنل سیکورٹی ایجنسی کے معاملات میں اصلاحات کا اعلان کیا۔ اس پر تبصرہ کرتے ہوئے نیویارک ٹائمز نے اپنے اداریے میں لکھا کہ ان اصلاحات کا یہ پہلو سب سے اہم ہے کہ اگر ایڈورڈ اسنوڈن نے امریکہ کے خفیہ نگرانی کے پروگرام کو ساری دنیا کے سامنے پیش نہ کیا ہوتا تو امریکہ کا صدر نیشنل سیکورٹی کے ادارے میں اصلاحات پر کبھی آمادہ نہ ہوتا۔ لیکن سوال یہ ہے کہ مغربی دنیا بالخصوص مغربی دنیا کی سب سے بڑی علامت امریکہ انسانوں کی آزادی کے ساتھ جو کھیل کھیل رہا ہے اس کی فکری بنیاد کیا ہے؟

20 ویں صدی میں ریاست کی طاقت اور شہریوں کی زندگی میں اس کی مداخلت کو دیکھتے ہوئے خطرہ ظاہر کیا گیا تھا کہ کہیں ریاست خود کو خدا نہ سمجھنے لگے۔ بدقسمتی سے یہی ہوا ہے۔ اگرچہ اس حوالے سے تیسری دنیا میں بھی صورت حال اچھی نہیں، لیکن مغرب کی نام نہاد فلاحی ریاست نے کمیونزم کا خطرہ ٹلتے ہی نہ صرف یہ کہ شہریوں کو فراہم کی گئی بہت سی مراعات واپس لینی شروع کردیں‘ بلکہ اس نے اپنے شہریوں کی سب سے بڑی متاع یعنی آزادی پر بھی حملہ کردیا۔ مذاہبِ عالم میں خداکے حاضر و ناظر ہونے کا تصور موجود ہے اور امریکہ کے خفیہ نگرانی کے پروگرام کی وسعت کو دیکھ کو آسانی کے ساتھ کہا جاسکتا ہے کہ امریکہ اس روئے زمین پر حاضر وناظر خد اکا قائم مقام بننے کے لیے کوشاں ہے۔ وہ صرف سامنے موجود اطلاع پر گزارا کرنے کے لیے تیار نہیں بلکہ وہ کروڑوں انسانوں کے دل و دماغ بھی پڑھنا چاہتا ہے۔ امریکہ کی اس ’’خدائی خواہش‘‘ کو اس کے مالی وسائل کی فراہمی اور ٹیکنالوجی کی ترقی نے ایک حد تک سہی، حقیقت میں ڈھال دیا ہے، لیکن ریاست کی اس خدائی نے نجی زندگی اور آزادی کے تصور کے پرخچے اڑا دیے ہیں۔ مغرب میں ریاست کی طاقت اتنی بڑھ گئی ہے کہ طاقت بجائے خود اخلاقیات بن گئی ہے اور اس کے ساتھ وہی تقدس وابستہ ہوگیا ہے جو اخلاقیات ہی کا حق ہے۔ لیکن یہ اس صورتِ حال کی واحدفکری بنیاد نہیں ہے۔

  انسانی تاریخ میں انسان کے مخصوص تصور نے بھی اہم کردار ادا کیا ہے۔ مثلاً اگر کوئی معاشرہ دل سے اس بات کا قائل ہوکہ انسان اشرف المخلوقات ہے، کائنات کا خلاصہ ہے، ایک اخلاقی وجود ہے تو وہ اسی اعتبار سے انسانوں کی ساتھ سلوک کرے گا۔ لیکن اگر کسی تہذیب اور کسی معاشرے میں یہ خیال جڑ پکڑ جائے کہ انسان محض ایک سیاسی یا معاشی حیوان ہے، ایک مفاد پرست وجود ہے تو پھر انسان کے ساتھ معاشرے کے تعلق کی نوعیت یکسر بدل جائے گی۔ مغربی دنیا بالخصوص امریکہ انسانوں کی آزادی کے ساتھ جو کچھ کررہا ہے اس کی پشت پر انسان کا مخصوص تصور موجود ہے۔ اس تصور میں انسان غیر ذمے دار ہے، ناقابلِ اعتبار ہے۔ تجزیہ کیا جائے تو امریکہ کا یہ عجیب تضاد ہے کہ ایک جانب وہ جدید تہذیب کی بلند ترین علامت ہے، اور تہذیب کی بلند ترین سطح انسان کو آزاد کرتی ہے۔ لیکن دوسری طرف وہ انسانوں کی بنیادی آزادیوں کے درپے ہے، اور ظاہر ہے کہ یہ رویہ تہذیب کی پست ترین علامت ہے۔ لیکن مسئلہ صرف اتنا سا نہیں ہے۔

مغربی تہذیب اور اس کی سب سے بڑی علامت کا ایک تضاد یہ ہے کہ یہ تہذیب ایک جانب خود کو ’’عالمگیر‘‘ کہتی ہے اور دوسری جانب وہ مسلمانوں کو کیا اہلِ یورپ، یہاں تک کہ اہلِ امریکہ کو بھی اپنا ’’غیر‘‘ سمجھتی ہے۔ ایسا نہ ہوتا تو امریکہ کے خفیہ ادارے صرف ’’دہشت گردوں‘‘ کی نگرانی کررہے ہوتے… کروڑوں امریکی اور یورپی باشندے ان کی زد میں نہ ہوتے۔

شاہنواز فاروقی

Double Standards of western world

ایڈم پرل مین کو میوزک کا شوق وراثت میں ملا ‘ اس کے والد فل پرل مین یہودی تھے‘ یہ بچپن سے موسیقی کے جنون میں مبتلا تھے‘ ایڈم کے دادا کارل پرل مین کیلیفورنیا کے مشہور یورالوجسٹ تھے‘ یہ متعصب یہودی تھے‘ یہ پوری زندگی اسرائیل کے قیام اور دنیا پر یہودی قبضے کے خواب کاشت کرتے رہے‘ ایڈم کی دادی عیسائی تھی‘ وہ ایک عیسائی میگزین بھی نکالتی تھی‘ ایڈم کے والد کا بچپن اور جوانی کیلیفورنیا میں گزری‘ انھوں نے ایڈم کی والدہ جینیفر کے ساتھ شادی کر لی اور یوں یہ خاندان مزے سے زندگی گزارنے لگا‘ فل پرل مین گانے گاتا تھا اور جینیفر بائبل پڑھتی تھی‘ ایک دن جینیفر نے بائبل میں غدن کا کردار پڑھا تومیاں بیوی دونوں نے اپنے نام کے ساتھ Gideon (عربی میں غدن) لگا لیا‘ یہ خاندان اب غدن ہو گیا‘ ایڈم پرل مین یکم ستمبر 1978ء کو ان کے گھر پیدا ہوا‘ ایڈم کے والدین اس وقت تک پروٹسٹنٹ عیسائی ہو چکے تھے‘ ایڈم کو میوزک‘ عیسائیت اور یہودی خون ورثے میں ملا‘یہ اسکول میں پڑھتا رہا اور موسیقی بجاتا رہا‘ ایڈم پرل مین نے ساڑھے سولہ سال کی عمر میں اسلام کا مطالعہ شروع کر دیا۔

یہ 1995ء کا سن تھا‘ یہ اپنے چند مسلمان دوستوں کے ساتھ اورنج کائونٹی کے اسلامک سینٹر میں داخل ہوا‘ اس نے حاتم بنداکی کے الفاظ سنے اور یہ دائرہ اسلام میں داخل ہو گیا‘ یہ روزانہ اسلامک سینٹر جاتا رہا‘ یہ اسلام کا مطالعہ کرتا رہا یہاں تک کہ اس نے سترہ سال کی عمر میں اسلام قبول کر لیا اور اس کا نام ایڈم پرل مین سے ایڈم یحییٰ غدن ہو گیا‘ اس نے موسیقی چھوڑ دی‘ داڑھی رکھی اور نماز روزے کی پابندی شروع کر دی‘ اس نے انٹرنیٹ پر اپنے قبول اسلام کا واقعہ لکھا تو اسے گرفتار کر لیا گیا‘ غدن کو سزا ہوئی اور اس سزا نے اسے پکا مسلمان بنا دیا‘ یہ 1998ء میں پاکستان آیا‘ پاکستان میں اس نے ایک افغان مہاجر لڑکی سے شادی کی‘ یہ 2001ء تک پاکستان میں رہا‘ اس دوران اس کا زیادہ تر وقت کراچی اور پشاور میں گزرا‘ یہ اپنے والدین کو بتاتا تھا ’’میں پاکستان میں صحافت کر رہا ہوں‘‘ لیکن یہ اس دور میں القاعدہ کا رکن تھا اور یہ اپنی صلاحیتوں کی وجہ سے نہ صرف اسامہ بن لادن کے قریب پہنچ چکا تھا بلکہ یہ ان کے ایڈوائزر میں بھی شامل تھا‘ یہ القاعدہ کا میڈیا ایڈوائزر بھی تھا‘ اس نے القاعدہ کے لیے ٹیلی ویژن پروڈکشن اور سوشل میڈیا ایکٹوٹیز شروع کیں‘ نائین الیون کا واقعہ ہوا۔

القاعدہ نے ایک ویڈیو ٹیپ کے ذریعے اس واقعے کی ذمے داری قبول کی‘ یہ ویڈیو ٹیپ یحییٰ غدن نے تیار کی تھی‘ غدن امریکی نظام کو سمجھتا تھا‘ یہ یورپی میڈیا کا نباض بھی تھا‘ یہ مغربی نظام کی خرابیوں اور کمزوریوں سے بھی واقف تھا چنانچہ اس نے مضامین‘ ویڈیو اور آڈیو ٹیپس کے ذریعے امریکی نظام کو نشانہ بنانا شروع کر دیا‘ امریکی انتظامیہ اس پر تلملا اٹھی‘ نائین الیون کے بعد ایڈم یحییٰ غدن کا اپنے خاندان سے رابطہ کٹ گیا‘ القاعدہ نے بھی اسے ’’ عزام الامریکی‘‘ کا نیا نام دے دیا‘ غدن نے 2004ء میں ایک ویڈیو پیغام کے ذریعے لاس اینجلس اور میلبورن کو نشانہ بنانے کی دھمکی دی‘ امریکا نے اسی دور میں اسے موسٹ وانٹیڈ لوگوں کی فہرست میں بھی شامل کر دیا اور اسے پکڑنے والے کے لیے ملین ڈالر انعام کی رقم بھی رکھ دی۔

یہ دوسری طرف اسامہ بن لادن اور ڈاکٹر ایمن الظواہری کے انتہائی قریب ہو گیا‘ یہ ان کے ویڈیو پیغام بھی ریکارڈ کرتا تھا‘ یہ ان کے نام سے پریس ریلیز بھی جاری کرتا تھا اور یہ القاعدہ کے ترجمان کی حیثیت سے امریکی میڈیا کو براہ راست دھمکیاں بھی دیتا تھا‘ 2008ء میں اس کے مرنے کی اطلاعات بھی آئیں اور 2010ء میں اس کی گرفتاری کی خبریں بھی آتی رہیں لیکن یہ زندہ بھی تھا اور متحرک بھی۔ غدن نے اس دوران عربی میں اپنی ٹیب جاری کر کے امریکیوں کو حیران کر دیا‘ یہ اس ٹیپ میں شاندار عربی بول رہا تھا‘ القاعدہ کے ارکان کے مطابق ایڈم یحییٰ غدن انگریزی‘ عربی‘ پشتو اور اردو چاروں زبانوں کا ماہر ہے‘ یہ حلیے کے لحاظ سے مسلمان عالم اور پشتون دکھائی دیتا ہے‘ آپ اسے دیکھ کر‘ اس کے ساتھ گفتگو کر کے ہرگز اندازہ نہیں کر سکتے‘ یہ امریکی ہے اور اس کے ماں باپ امریکی بھی ہیں اور یہودی اور عیسائی بھی۔ یہ آپ کو نسلاً مسلمان دکھائی دے گا۔

ایڈم یحییٰ غدن پچھلے چار برسوں سے افغانستان اور پاکستان میں چھپا بیٹھا ہے‘ یہ خطرے کا شکار ہوتا ہے تو یہ افغانستان چلا جاتا ہے‘ وہاں حالات خراب ہوتے ہیں تو یہ شمالی وزیرستان‘ جنوبی وزیرستان اور بعض اوقات بنوں اور پشاور میں آ جاتا ہے‘ یہ مدارس‘ حجروں اور غاروں میں زندگی گزارتا ہے‘ امریکا اسے گرفتار یا قتل کرنا چاہتا ہے‘ سی آئی اے دس سال کی کوششوں کے بعد ایڈم یحییٰ غدن تک پہنچا‘ یہ پاکستان میں موجود اس کے ٹھکانوں تک بھی پہنچ گیا‘ ایڈم فروری کے ابتدائی دنوں میں ڈرون کے نشانے پر بھی آ گیا مگر امریکی انتظامیہ اس پر میزائل نہیں داغ سکی‘ ایڈم میزائل اور ڈرون حملے سے کیوں بچ گیا؟ اس کی وجہ بہت دلچسپ ہے۔امریکی صدر‘ پینٹا گان اور امریکی سی آئی اے امریکی قوانین کے ہاتھوں بے بس ہیں‘ امریکا کا کوئی ادارہ قانوناً اپنے کسی شہری کو ڈرون حملے میں قتل نہیں کر سکتا‘ سی آئی اے موسٹ وانٹیڈ امریکی شہری پر حملے سے قبل وزارت قانون کی اجازت کی پابند ہے۔

وزارت قانون عدالت کی اجازت کے بغیر یہ اجازت نہیں دے سکتی اور عدالتیں اس وقت تک ایسی اجازت نہیں دیتیں جب تک یہ دوسرے فریق کو نہ سن لیں چنانچہ ایڈم یحییٰ غدن پر قانوناً ڈرون حملہ نہیں ہو سکتا‘ سی آئی اے کے بعد پینٹا گان کے پاس دوسرا آپشن بچتا ہے‘ پینٹا گان فوجی دستے پاکستان بھجوا سکتا ہے‘ امریکا کے فوجی ہیلی کاپٹروں پر پاکستانی علاقے میں آئیں‘ اسامہ بن لادن جیسا آپریشن کریں‘ ایڈم یحییٰ کو فاٹا سے اٹھائیں اور افغانستان چلے جائیں لیکن اس میں دو خطرات ہیں‘ ایک خطرہ ایڈم یحییٰ ہے‘ یہ اگر اس آپریشن کے دوران مارا جا تا ہے اور اس کی ہلاکت کے بعد اگر اس کے والدین امریکا میں پینٹا گان کے خلاف مقدمہ دائر کر دیتے ہیں تو ڈیفنس سیکریٹری چک ہیگل مشکل میں پھنس جائیں گے‘ دوسرا خطرہ پاکستان ہے‘ ایڈم یحییٰ پاکستانی علاقے میں چھپا بیٹھا ہے‘ اسامہ بن لادن کے آپریشن کے دوران پاکستان کو بہت ہزیمت اٹھانا پڑی تھی اور دنیا نے بھی جی بھر کر ساتویں جوہری طاقت کا مذاق اڑایا لیکن کیونکہ امریکا کا ٹارگٹ بہت بڑا تھا اور امریکا اس ٹارگٹ کو اچیو کرنے میں بھی کامیاب ہو گیا تھا۔

چنانچہ پاکستان خاموش رہا‘ پینٹا گان کا خیال ہے اگر ہم نے اس بار ایڈم یحییٰ غدن جیسے چھوٹے ٹارگٹ کے لیے سرحد عبور کی تو پاکستان خاموش نہیں رہے گا اور اگر پاکستان کی طرف سے میزائل داغ دیا گیا یا امریکی ہیلی کاپٹروں کو نشانہ بنا دیا گیا تو امریکا اور پاکستان کے درمیان تعلقات خراب ہو جائیں گے اور یہ وقت اس کے لیے مناسب نہیں کیونکہ امریکا 2014ء میں خطے سے نکلنا چاہتا ہے اور یہ انخلاء پاکستان کے بغیر ممکن نہیں ہوگا چنانچہ پینٹا گان بھی مشکل میں آ گیا ہے تاہم امریکی صدر کے پاس ایسے اختیارات موجود ہیں‘ یہ خصوصی اختیارات استعمال کرتے ہوئے ملک کے کسی بھی ادارے کو غدن کے خلاف کارروائی کا حکم دے سکتے ہیں‘ صدر کو یہ اختیارات انور العولقی کے کیس میں حاصل ہوئے تھے‘ انور العولقی یمنی امریکن تھا‘ اس کے والد 1970ء میں یمن سے اعلیٰ تعلیم حاصل کرنے کے لیے امریکا آئے تھے‘ انور کے والد نصیر العولقی فل برائٹ اسکالر تھے‘ انھوں نے نیو میکسیکو کی اسٹیٹ یونیورسٹی سے ایگریکلچر اکنامکس میں ماسٹر کیا۔

یونیورسٹی آف نبراسکا سے ڈاکٹریٹ کی اور یہ 1975ء سے 1977ء تک یونیورسٹی آف مینی سوٹا میں پڑھاتے رہے‘ یہ بعد ازاں یمن واپس گئے اور یمن کے وزیر زراعت بن گئے‘ انور العولقی 1971ء میں نیو میکسیکو میں پیدا ہوا‘ یہ سات سال کی عمر میں والد کے ساتھ یمن چلا گیا‘یہ گیارہ سال وہاں رہا‘ اس نے وہاں مذہبی تعلیم بھی حاصل کی‘ 1991ء میں واپس امریکا آیا‘ کولوراڈو کالج میں داخلہ لیا‘ کولوراڈو یونیورسٹی سے سول انجینئرنگ میں بی ایس سی کی‘ پھرسنیٹیا یونیورسٹی سے ایجوکیشن لیڈر شپ کی ڈگری لی‘ پھر جارج واشنگٹن یونیورسٹی سے ہیومن ریسورس ڈویلپمنٹ کی ڈگری لی اور اس کے بعد امریکا کے مختلف اداروں میں کام کرنے لگا‘ اس نے اس کے ساتھ امریکا میں تبلیغ کا کام بھی شروع کر دیا‘ یہ ڈینور کی اسلامک سوسائٹی سے بطور امام وابستہ ہو گیا‘ اس نے امریکا کی طوائفوں کو سیدھا راستہ دکھانے کی کوشش شروع کی‘ پولیس کیس بنا اور یہ چند ماہ جیل میں بھی رہا‘ یہ بعد ازاں نائین الیون کے واقعے کے ذمے داروں میں پایا گیا‘ نائین الیون کے واقعے کا جرمنی کے شہر ہیمبرگ سے بھی تعلق تھا‘ ہیمبرگ کے ایک فلیٹ میں رمزی بن الشبیع مقیم رہا تھا‘اس فلیٹ سے جو ٹیلی فون نمبر ملے ان میں انور العولقی کا نمبر بھی شامل تھا اور یوں سی آئی اے انور کے پیچھے لگ گئی.

انور 2002ء میں امریکا سے فرار ہو کر لندن آگیا‘ یہ 2004ء تک لندن رہا‘ یہ پھر یمن چلا گیا اور یہ یمن کے مختلف شہروں میں چھپتا رہا‘ سی آئی اے اس کا پیچھا کرتی رہی یہاں تک کہ اسے 30 ستمبر 2011ء کو یمن کے صوبے الجوف میں ڈرون حملے میں مار دیا گیا‘ انور العولقی بھی امریکی شہری تھا‘ اس کی ہلاکت کے بعد صدر کو محسوس ہوا‘ میرے پاس انور العولقی جیسے لوگوں کو گرفتار یا مارنے کے لیے خصوصی اختیارات ہونے چاہئیں چنانچہ صدر نے آئین میں ترمیم کے ذریعے یہ خصوصی اختیارات حاصل کر لیے‘ صدر اوبامہ کے پاس اس وقت یہ اختیارات موجود ہیں لیکن یہ ان اختیارات کے استعمال سے گھبرا رہے ہیں کیونکہ یہ سمجھتے ہیں‘ اس معاملے میں اگرذرا سی غلطی ہو گئی تو ان کا مواخذہ ہو جائے گا‘ یہ عدالتی نظام کے شکنجے میں آ جائیں گے ‘ اوبامہ کے اس خوف کی وجہ سے ایڈم یحییٰ غدن روز امریکی ڈرونز کے نشانے پرآتا ہے لیکن کسی کو اس پر حملے کی جرات نہیں ہوتی۔

آپ فرق ملاحظہ کیجیے‘ امریکا نے پاکستان میں 364 ڈرون حملے کیے‘ ان حملوں میں تین ہزار پاکستانی شہید ہو گئے ‘ امریکا نے کسی ایک ڈرون حملے سے قبل ایک لمحے کے لیے نہیں سوچا لیکن پورا امریکا اپنے ایک باغی شہری کے لیے ٹھوڑی کے نیچے ہاتھ رکھ کر بیٹھا ہے‘ یہ اسے مارنا چاہتے ہیں لیکن مار نہیں رہے‘ یہ ہے رول آف لاء اور اسے کہتے ہیں انصاف کا خوف۔

ایک خبر کے مطابق حکومت نے آئی ایم ایف کے مطالبے پر بجلی اور گیس کے نرخوں میں اضافے کا فیصلہ کرلیا ہے۔ای سی سی نے نیپرا کو بجلی کے نرخ مقرر کرنے کا اختیار دیدیا ہے ۔ جنوری میں ہی بجلی کے نرخوں میں ایک روپے فی یونٹ اضافہ کردیا گیا تھا۔ گزشتہ کئی برسوں سے بجلی کے نرخوں میں اضافے کا سلسلہ جاری ہے۔ اس کی وجہ یہ بتائی جارہی ہے کہ بجلی کی پیداواری لاگت میں اضافہ ہوتا چلا جا رہا ہے۔ ماہرین کے مطابق حکومت لائن لاسز کو کم سے کم کرکے اپنے نقصان کو گھٹا سکتی ہے۔ لیکن اس طرف توجہ دینے کے بجائے سارا زور اس بات پر صرف کردیا جاتا ہے کہ بجلی کے نرخوں میں اضافہ کردیا جائے۔

یہ بات درست ہے کہ تیل پر مبنی بجلی کی پیداواری لاگت بہت زیادہ ہے۔ لیکن پاکستان جوکہ قدرتی وسائل سے مالا مال ملک ہے، پاکستان کو ملنے والے دریاؤں پر بھارت بڑی تیزی کے ساتھ ڈیمز تعمیر کیے چلا جا رہا ہے جس کی وجہ سے اول پاکستان کو زرعی مقاصد کے لیے ملنے والا پانی بھی کم سے کم ہوتا چلا جا رہا ہے، جس کے بعد میں ڈیمز کی تعمیر کے ساتھ بجلی کی پیداوار بھی کم ہوتی چلی جائے گی۔ حال ہی میں مقبوضہ کشمیر میں دریائے چناب کی وادی میں بھی کئی ڈیمز کی تعمیر کی منصوبہ بندی کی جا رہی ہے، جس سے بھارت میں سستی بجلی وافر مقدار میں پیدا کی جائے گی جب کہ پاکستان نے 1974 میں تربیلا ڈیم کی تعمیر کے بعد سستی بجلی کے لیے ڈیمز کی تعمیر کا سلسلہ ترک کردیا۔

بعد میں 1994 میں مغربی طاقتوں کے مشورے سے بجلی کے انتہائی مہنگے منصوبے شروع کیے جس میں پہلے تیل استعمال کیا جاتا تھا، بعد میں کچھ پیداواری یونٹوں کو گیس میں تبدیل کیا گیا۔ ان تمام باتوں کے باوجود مجموعی طور پر بجلی کی پیداواری لاگت پھر بھی زیادہ رہی۔ دنیا بھر میں سستا ترین بجلی کا اہم ترین ذریعہ پن بجلی کا حصول ہے۔ پاکستان کے بارے میں ماہرین کا خیال ہے کہ پانی سے بجلی کی پیداوار ایک لاکھ بیس ہزار میگاواٹ سے زائد حاصل کی جاسکتی ہے لیکن کل 6500 میگاواٹ بجلی حاصل کی جا رہی ہے۔ جو کل پیداوار کا 33 فیصد ہے، باقی 67 فیصد بجلی انتہائی مہنگے ذرایع سے حاصل کی جا رہی ہے۔

بجلی کی پیداوار کا ایک اور سستا ذریعہ کوئلے کے ذریعے بجلی کی پیداوار ہے۔ دنیا بھر میں اس ذریعے سے بجلی 41 فیصد پیدا کی جاتی ہے۔ جب کہ پاکستان نے اس سستے ذریعے سے اب تک بھرپور فائدہ نہیں اٹھایا ہے۔ امریکا پاکستان کو کوئلے کے ذرایع سے فائدہ اٹھانے کی شدید مخالفت کر رہا ہے۔ جب کہ خود امریکا میں کوئلے کے ذریعے سب سے زیادہ بجلی پیدا کی جاتی ہے۔ بتایا جاتا ہے کہ امریکا کوئلے کے ذریعے اپنی بجلی کی پیداوار کا 43 فیصد حاصل کرتا ہے جب کہ پاکستان کے بارے میں یہ کہا جاتا ہے کہ کوئلے سے بجلی پیدا کرنے کے سبب فضائی آلودگی پیدا ہوگی۔ حالانکہ موجودہ دور میں ایسی ٹیکنالوجیز آگئی ہیں جن کی وجہ سے فضائی آلودگی کو کنٹرول کیا جارہا ہے۔ حال ہی میں کوئلے کے ذریعے بجلی کی پیداوار کے لیے تھرکول پراجیکٹ کا افتتاح کیا گیا ہے جب کہ ایشیائی ترقیاتی بینک نے کوئلے سے بجلی کی پیداوار کے لیے جامشورو پاور پلانٹ کو 90 کروڑ ڈالر کی فراہمی کے لیے ایک معاہدہ کیا ہے جس سے 600 یونٹ کے 2 پیداواری یونٹ قائم کیے جائیں گے۔ ایشیائی ترقیاتی بینک توانائی منصوبوں کے لیے 3 ارب ڈالر فراہم کرے گا۔

اس منصوبے کی تکمیل سے 50 کروڑ ڈالر سالانہ تیل کی بچت ہوگی۔ جب کہ اس منصوبے میں درآمدی کوئلہ اور تھر کا کوئلہ بھی استعمال کیا جائے گا۔ حکومت کو اس بات کی کوشش کرنا چاہیے کہ ایشیائی ترقیاتی بینک سے 3 ارب ڈالر کی فراہمی کا رخ پن بجلی کے منصوبوں کی طرف موڑا جائے۔ ماضی میں کئی ڈیمز کی تعمیر اسی لیے شروع نہ ہوسکی کہ مطلوبہ فنڈز کے لیے قرض فراہم کرنے والے ادارے اس بات پر رضامند نہیں تھے کہ طویل المیعاد منصوبے شروع کیے جائیں۔ یہ بات بھی حیران کن ہے کہ اب بتایا جا رہا ہے کہ دیامر بھاشا ڈیم کے لیے زمین کے حصول کا عمل جاری ہے حالانکہ اس سے قبل اس ڈیم کے بارے میں یہی بتایا جاتا تھا کہ فزیبلٹی رپورٹ تیار ہو چکی ہے۔ فنڈز کی عدم دستیابی کے باعث منصوبہ شروع نہ ہوسکا۔ اتنے عرصے سے یہ منصوبہ زیر غور تھا۔ جب کہ حقیقت یہ ہے کہ اس منصوبے کے لیے زمین کے حصول کا عمل اب شروع کیا گیا ہے۔ اس طرح کے تاخیری حربوں سے جہاں طویل المیعاد منصوبے مزید طوالت اختیار کر جاتے ہیں اس کے ساتھ ہی ان منصوبوں کی تعمیری لاگت میں بھی مزید اضافہ ہوجاتا ہے۔

ضرورت اس امر کی ہے کہ تیل اور گیس کے علاوہ کوئلے سے بجلی پیدا کرنے سے زیادہ اہمیت پن بجلی کو دی جائے کیونکہ یہی سب سے سستا ترین ذریعہ ہے۔ ایسے منصوبے طویل المیعاد ہوتے ہیں لیکن جہاں فوری پیداوار کے لیے دیگر مہنگے ذرایع اختیار کیے جا رہے ہیں، اس کے ساتھ ہی پن بجلی کے منصوبوں پر تیزی سے کام کیا جائے، پن بجلی کے بڑے اور طویل المعیاد منصوبوں کے علاوہ کم سرمایہ سے تیار ہونے والے اور کم مدت میں تیار ہونے والے پن بجلی گھروں کی تعمیر کا سلسلہ شروع کیا جائے۔ جولائی 2013 میں پاکستان کے پہلے پن بجلی گھر کا افتتاح کیا گیا تھا۔ دریائے جہلم پر نجی شعبے کی طرف سے یہ پہلا منصوبہ لگایا گیا تھا۔

اس قسم کے منصوبے نیشنل گرڈ اسٹیشن کے قریب لگائے جائیں چونکہ بجلی کی پیداوار کے بعد گرڈ اسٹیشن تک پہنچانے میں کافی سرمایہ لگ جاتا ہے اس لیے بعض سرمایہ کار رقوم لگانے سے احتراز کرتے ہیں۔ سندھ اور پنجاب کی نہروں پر ٹربائن لگا کر بھی بجلی پیدا کی جاسکتی ہے۔ ماہرین کے نزدیک سردست سندھ اور پنجاب کی نہروں میں ٹربائن لگا کر ایک ہزار میگاواٹ بجلی حاصل کی جاسکتی ہے۔ ادھر صوبہ خیبر پختونخوا کی حکومت نے بھی پن بجلی کے کئی منصوبوں پر کام شروع کردیا ہے۔ کچھ منصوبوں کا افتتاح بھی کردیا ہے۔ اس کے علاوہ آیندہ مزید منصوبوں پر کام کا آغاز کردیا جائے گا۔ ایک اندازے کے مطابق آیندہ چند سال میں ان منصوبوں کی تکمیل سے 3200 میگاواٹ بجلی حاصل ہوگی۔ حکومت پنجاب نے بھی پن بجلی کے کئی منصوبے شروع کیے ہوئے ہیں۔ تونسہ پن بجلی منصوبے کے بارے میں ایک بریفنگ میں بتایا گیا کہ اس منصوبے کی تکمیل سے ایک سو بیس میگاواٹ بجلی حاصل ہوگی۔

بہرحال یہ بات طے ہے کہ پاکستانی عوام اور صنعتیں مہنگی بجلی کے متحمل نہیں ہوسکتے اور حکومت کی معاشی اور مالیاتی کمزوری اس بات کا تقاضا کرتی ہے کہ جلد از جلد مہنگی بجلی کی پیداوار سے ہٹ کر سستی بجلی پیدا کی جائے اور ایسے ہی منصوبے چاہے وہ چھوٹے پیمانے پر بجلی پیدا کریں یا بڑے پیمانے پر بجلی حاصل ہوسکتی ہو اس پر بھرپور توجہ دی جائے اور ایسے منصوبوں کے لیے فنڈنگ اور دیگر تیکنیکی سہولیات کے حصول کو اولین اہمیت دی جائے، ان منصوبوں کو شروع کرنے کے بعد ان کی تکمیل کی طرف بھرپور توجہ دی جائے۔ آئی ایم ایف کا یہ کہنا درست ہے کہ بجلی کے نرخ بڑھائے جائیں یا پھر بجلی کی پیداواری لاگت کو گھٹایا جائے۔

گزشتہ سال جولائی میں حکومت نے 502 ارب کے گردشی قرضے اتارے ہیں جن میں پھر دوبارہ اضافہ ہوتا جا رہا ہے اب تک پھر گردشی قرضے 190 ارب روپے تک پہنچ گئے ہیں۔ حال ہی میں ترکی اور سعودی عرب کی طرف سے توانائی کے منصوبوں میں سرمایہ کاری پر دلچسپی کا اظہار کیا گیا ہے، جس سے امید کی جاتی ہے کہ نجی شراکت داروں کو پن بجلی کے منصوبوں کی طرف راغب کیا جا سکے گا۔ بجلی کے نرخ بڑھا دینا دراصل صارفین کے ساتھ ظلم کے علاوہ صنعتوں کے دروازے بند کردینے کے مترادف ہے۔ نیز ملکی سرمایہ کاری میں بھی ایک بہت بڑی رکاوٹ ہے۔ چین اور دیگر ممالک نے سب سے پہلے سستی بجلی کی فراہمی کا بندوبست کیا۔ جس سے ان ملکوں کی پیداوار عالمی مارکیٹ میں مقابلے کی سکت پیدا ہوئی۔ پاکستانی صنعتکاروں کا المیہ یہ ہے کہ بجلی مہنگی ہونے کے باعث پیداواری لاگت بہت بڑھ جاتی ہے۔ جس کی وجہ سے عالمی مارکیٹ میں مقابلے کی سکت نہیں رہتی اور برآمدات پر منفی اثرات مرتب ہوتے ہیں۔ ملکی ترقی برآمدات میں اضافے اور غریب عوام کو ریلیف دینے کے لیے ضروری ہے کہ بجلی کے نرخوں میں اضافہ کرنے کے بجائے سستی بجلی پیدا کی جائے اور ارزاں نرخوں پر عوام اور صنعت کو بجلی فراہم کی جائے۔

یم آئی خلیل 

وہ ایک بدصورت لڑکی تھی‘ رنگت سیاہ تھی‘ ہونٹ موٹے تھے‘ بال کرلی اور الجھے ہوئے‘ ہاتھ اور پائوں بھرے‘ آواز بیٹھی ہوئی‘ کندھے جھکے ہوئے‘ آنکھیں باہر کی طرف ابلی ہوئیں‘ کمر اندر کی طرف دبی ہوئی اور ناک پکوڑا سی‘ اس کے چہرے کی جلد بھی اللہ معاف کرے گوبر کے اوپلے کی طرح کھردری اور لکیر دار تھی‘ وہ کسی زاویے‘ کسی اینگل سے خوبصورت دکھائی نہیں دیتی تھی لیکن وہ اس کے باوجود کمپنی کی کامیاب ترین سیلز گرل تھی‘ وہ نیویارک کی ایک گروسری چین میں کام کرتی تھی‘ امریکا میں اس چین کے سیکڑوں اسٹور تھے‘ نیویارک میں بڑا اسٹور تھا اور وہ اس بڑے اسٹور کی سیلز گرل تھی‘ کمپنی ہر مہینے عملے کی کارکردگی کا جائزہ لیتی تھی‘ وہ ہر جائزے میں پہلے نمبر پر آتی تھی‘ انتظامیہ اس کی کارکردگی پر حیران تھی‘ کمپنی کے صدر نے ایک دن اس سے کامیابی کا گر پوچھ لیا‘ یہ کمپنی کی سالانہ میٹنگ تھی‘ میٹنگ میں صرف ایگزیکٹوز اور ڈائریکٹرز شریک تھے‘ وہ کمپنی کی تاریخ کی واحد ملازمہ تھی‘ جسے ڈائریکٹرز اور ایگزیکٹوز نے اس اعلیٰ ترین میٹنگ میں شرکت کی دعوت دی اور اس سے کمپنی کے پالیسی سازوں کے سامنے کامیابی کا گر پوچھا گیا‘ کمپنی کا صدر میٹنگ کو چیئر کر رہا تھا‘ وہ اس بدصورت لیکن کامیاب ترین سیلز گرل کے چہرے پر نظریں جمائے بیٹھا تھا۔

لڑکی نے مسکرا کر جواب دیا ’’دو گر ہیں‘‘ میٹنگ میں موجود تمام گرو اسے غور سے دیکھنے لگے‘ اس نے جواب دیا ’’ پہلا گر میری جسمانی بدصورتی ہے‘ میرے جسم میں کوئی چیز خوبصورت نہیں تھی‘ میں بچپن ہی میں اپنی اس خامی کو سمجھ گئی چنانچہ میں نے اپنے ذہن‘ اپنی اخلاقیات اور اپنی زبان کو خوبصورت بنا لیا‘ مجھے دیکھنے والے مجھے مسترد کر دیتے ہیں لیکن مجھ سے ملنے والے‘ میرے ساتھ گفتگو کرنے والے اور میرے ساتھ ڈیل کرنے والے مجھے کبھی بھول نہیں پاتے‘ یہ مجھے ہمیشہ یاد رکھتے ہیں‘‘ اس نے سانس لیا اور اس کے بعد بولی ’’ اور دوسرا گر میرا دوسرا پھیرا ہے‘ میں اپنے کسٹمر کو کائونٹر پر کھڑا کرتی ہوں اور اس کے پاس دو بار آتی ہوں‘‘ میٹنگ میں شریک ڈائریکٹرز کو پہلی بات فوراً سمجھ آگئی‘ یہ جان گئے کمپنی کی بدصورت ترین سیلز گرل اخلاقیات‘ گفتگو اور ڈیل میں خوبصورت ترین ہے چنانچہ یہ اپنے لب ولہجے‘ انداز گفتگو اور مینرز کے ذریعے گاہکوں کو گرفت میں لے لیتی ہے لیکن انھیں دوسرے پھیرے کا گر سمجھ نہ آیا لہٰذا وہ آنکھیں پھاڑ پھاڑ کر اس کی طرف دیکھنے لگے‘ خاتون مسکرائی اور نرم لہجے میں بولی ’’ فرض کیجیے‘ آپ میرے کسٹمر ہیں‘ آپ میرے کائونٹر پر ایک کلو گرام چینی لینے آتے ہیں میں اسٹور میں جائوں گی‘ کلو گرام کے تھیلے میں ذرا سی چین کم ڈالوں گی‘ یہ تھیلہ گاہک کے سامنے لائوں گی‘ اسے ترازو میں رکھوں گی‘ چینی کم ہوگی‘ میں وہ تھیلہ اور وہ گاہک وہاں چھوڑ کر اسٹور میں جائوں گی اور وہاں سے باقی چینی لے کر دوبارہ واپس آئوں گی‘ میرے دوسری بار اندر جانے‘ واپس آنے اور تھوڑی سی چینی زیادہ ڈالنے سے گاہک کو اپنی اہمیت کا احساس ہو گا‘ وہ مجھ سے متاثر ہو جائے گا چنانچہ وہ ہر بار ہمارے اسٹور سے گروسری خریدے گا‘ وہ ہر بار مجھ سے سودا خریدنے کی کوشش بھی کرے گا‘‘.

بورڈ آف ڈائریکٹرز کے لیے یہ ایک عجیب گر تھا‘ ڈائریکٹرز سیلز نے کرسی پر پہلو بدلا اور اس سے مخاطب ہوا ’’ ملیا لیکن ہمارے اسٹور کی زیادہ تر مصنوعات پیکٹس میں ہوتی ہیں‘ آپ ان کا وزن نہیں کر سکتیں‘‘ ملیا مسکرائی اور پورے یقین سے بولی ’’ سر میں گاہک کی ٹوکری میں سے کوئی پیکٹ اٹھاتی ہوں‘ اس کا وزن کرتی ہوں‘ وہ پیکٹ اگر وزن میں کم ہو تو میں اس کی جگہ پورے وزن والا پیکٹ رکھ دیتی ہوں اور اگر تمام پیکٹس کا وزن کم ہو تو میں ڈبے کھول کر اس پیکٹ کا وزن پورا کر دیتی ہوں‘ گاہک میری اس توجہ سے متاثر ہو جاتا ہے‘‘ ڈائریکٹر سیلز نے پوچھا ’’کیا دوسری سیلز گرلز ایسا نہیں کرتیں‘‘ ملیا نے مسکرا کر جواب دیا ’’ سر وہ خوبصورت ہیں اور خوبصورتی کو تکنیک کی ضرورت نہیں ہوتی۔

خوبصورت لوگ اپنے خوبصورت فگر‘ اپنی خوبصورت آنکھوں‘ اپنے خوبصورت ہونٹوں‘ اپنے گورے رنگ‘ اپنے قد کاٹھ اور اپنے خوبصورت ہاتھوں اور پائوں کو اپنی طاقت سمجھ لیتے ہیں‘ یہ اسے اپنا سیلز پوائنٹ بنا لیتے ہیں اور یہ بھول جاتے ہیں لوگوں کو آپ کی مسکراہٹ اپنی طرف متوجہ تو کر سکتی ہے‘یہ انھیں اپنے پاس ٹھہرا نہیں سکتی‘ مریضوں کو اچھی نرس چاہیے ہوتی ہے‘ خوبصورت نرس نہیں‘ آپ انتہائی خوبصورت نرس ہیں لیکن آپ مریض کے بازو کی غلط جگہ پر انجیکشن لگا دیتی ہیں تو کیا مریض آپ کی خوبصورتی کی وجہ سے خاموش رہے گا‘ ہرگز نہیں‘ وہ طوفان کھڑا کر دے گا‘ لوگ خوبصورت ماڈل کی وجہ سے فریج کا اشتہار تو دیکھ لیتے ہیں لیکن یہ جب بھی فریج خریدیں گے یہ فریج کی کارکردگی کو ذہن میں رکھ کر خریدیں گے‘ یہ ماڈل کے حسن کے جلوئوں کو دیکھ کر نہیں خریدیں گے۔

اخلاقیات‘ بی ہیویئر اور آپ کی شائستگی آپ کی اصل طاقت ہوتی ہے اور آپ کو اس طاقت کا استعمال سیکھنا چاہیے‘‘ وہ رکی اور دوبارہ بولی ’’ اور دوسری بات میری دوسری کولیگز اپنا پھیرا بچانے کے لیے عموماً اسٹور سے لفافے میں زیادہ چینی ڈال کر لاتی ہیں‘ یہ گاہک کے سامنے چینی تولتی ہیں‘ لفافے میں موجود زائد چینی نکالتی ہیں اور ایک کلو گرام کا پیکٹ بنا کر گاہک کو دے دیتی ہیں‘ یہ چینی پوری ہوتی ہے لیکن گاہک کیونکہ لفافے سے چینی نکلتے دیکھتا ہے لہٰذا وہ سمجھتا ہے‘سیلز گرل نے اسے پوری چینی نہیں دی اور یہ غلط سوچ اس سیلز گرل اور اسٹور دونوں کو نقصان پہنچاتی ہے چنانچہ میرا خیال ہے‘ ہم اگر اپنے اسٹور میں دوسرے پھیرے کو لازم قرار دے دیں تو ہماری سیل میں بھی اضافہ ہو سکتا ہے اور سیلز مین اور سیلز گرلز کی کارکردگی بھی بہتر ہو سکتی ہے‘‘ اس معمولی سی ٹپ سے بورڈ کے تمام ارکان متاثر ہو گئے‘ وہ اپنی نشستوں سے اٹھے اور ملیا کے لیے تالیاں بجانا شروع کر دیں‘ یہ ملیا بعد ازاں امریکا کی نامور سیلز گرل بنی‘ اس نے نئے سیلزمین اور سیلز گرلز کی ٹریننگ کا سلسلہ شروع کیا اور امریکا کے ہزاروں سیلزمین کو سیلز کی ٹریننگ دی۔

آپ ملیا کی کامیابی پر غور کریں تو آپ کو معلوم ہو گا اس نے اپنی بدصورتی کو اپنی طاقت بنا لیا تھا‘ یہ جان گئی تھی‘ اس کے پاس لوگوں کو متاثر کرنے کے لیے خوبصورت آنکھیں‘ خوبصورت ہونٹ‘ خوبصورت چہرہ‘ خوبصورت گردن اور خوبصورت قد کاٹھ نہیں‘ اس کی چال بھی مستانی نہیں اور اس کا سراپا بھی خوبصورت نہیں چنانچہ اس کے پاس ایک ہی آپشن بچتا ہے‘ یہ اپنے اندر کی ملیا کو اتنا خوبصورت بنا لے کہ اس کی اندرونی اچھائیاں اس کی بیرونی خامیوں پر پردہ ڈال دیں‘ اس کے اندر کی روشنی اس کے باہر کے اندھیرے میں چمک پیدا کر دے‘ ملیا نے اپنے اندر پر توجہ دی اور اس کی پوری کائنات بدل گئی‘ قدرت ہمیں آٹھ ہزار صلاحیتیں دے کر دنیا میں بھجواتی ہے‘ آپ اگر دنیا کے تمام ٹریڈز‘ تمام پیشوں اور تمام کاموں کی فہرست بنائیں تو یہ فہرست 85 کے عدد سے اوپر نہیں جائے گی جب کہ قدرت ہمیں ان 85 پیشوں یا مہارتوں کے لیے آٹھ ہزار صلاحیتیں دے کر دنیا میں بھجواتی ہے‘ ہم اگر ان آٹھ ہزار صلاحیتوں میں صرف دس فیصد کو استعمال کر لیں تو دنیا ہزار سال تک ہمارا نام یاد رکھنے پر مجبور ہو جائے گی‘ دنیا میں ایسے ایسے لوگ گزرے ہیں جو ایک سوئی زمین پر گاڑتے تھے۔دوسری سوئی لے کر تین گز کے فاصلے پر بیٹھ جاتے تھے‘ یہ دوسری سوئی پھینکتے تھے اور یہ سوئی زمین پر گڑھی سوئی کے ناکے سے گزر جاتی تھی‘ یہ ان آٹھ ہزار صلاحیتوں میں سے ایک صلاحیت کا استعمال تھا.

بھارت میں آج بھی ایسے لوگ موجود ہیں جو کھائے پیئے بغیر دو‘ دو سال گزار دیتے ہیں‘ جانوروں کی بولیاں سمجھنے اور بولنے والے سیکڑوں لوگ موجود ہیں‘ روس میں دنیا کا سرد ترین گائوں اومیاکون (Oymyakon) موجود ہے‘ اس کا درجہ حرارت منفی پچاس سے منفی 70 ڈگری سینٹی گریڈ تک چلا جاتا ہے‘ اس درجہ حرارت میں زندگی ممکن نہیں رہتی مگر اس گائوں میں آج بھی پانچ سو لوگ موجود ہیں‘ یہ لوگ سردی کے موسم میں بھی باہر نکلتے ہیں اور زندگی کے زیادہ تر تقاضے پورے کرتے ہیں‘ مریخ پر زندگی ممکن نہیں مگر انسان مریخ پر جانے کے لیے پرتول رہا ہے‘ سمندر کے اندر میلوں گہرے گڑھے ہیں‘ دنیا کا گہرا ترین گڑھا بحراوقیانوس میں ماریانہ ٹرینچ ہے۔اس کی گہرائی پونے سات میل ہے‘ لوگ اس گڑھے میں اترنے اور اس کی گہرائی تک جانے کی کوشش کر رہے ہیں اور یہ کسی نہ کسی دن چلے بھی جائیں گے اور یہ ان 8 ہزار صلاحیتوں میں سے چند ہیں جو قدرت ہمیں دے کر دنیا میں بھجواتی ہے لیکن ہم اپنی جسمانی کمزوریوں‘ اپنی جسمانی ساخت کی خرابیوں کو رکاوٹ بنا کر پوری زندگی رو دھو کر گزار دیتے ہیں‘ اس دنیا میں جس میں زرافے خوراک کے لیے اپنی گردن لمبی کر لیتے ہیں‘ ہم انسان اس دنیا میں اپنے چہرے کے رنگ سے ہار جاتے ہیں‘ ہم اپنے قد کاٹھ سے مار کھا جاتے ہیں‘ ہم کس قدر بے وقوف ہیں‘ ہم یہ نہیں جانتے‘ قدرت نے ہمیں آٹھ ہزار صلاحیتیں دیں‘ ان میں سے صرف 36 دوسرے لوگوں کو نظر آتی ہیں‘ باقی سات ہزار 9 سو 64 ہمارے اندر چھپی ہیں لیکن ہم پوری زندگی اپنے ان سات ہزار 9 سو 64 دوستوں کو آواز نہیں دیتے‘ ہم انھیں جگانے‘ انھیں اٹھانے کی کوشش نہیں کرتے چنانچہ ہم اپنی جسمانی کمزوریوں کا رونا رو کر دنیا سے رخصت ہو جاتے ہیں۔

جاوید چوہدری   

جسے اللہ رکھے اسے کون چکھے ۔ یہ مثل بریگیڈیئر باسط پر صادق آتی ہے ۔ پرسوں ان کے قافلے پر خودکش حملہ ہوا جس میں وہ بال بال بچ گئے ۔ دوسرے ساتھیوں کو بھی کوئی زخم تک نہ آیا۔ ایک کمانڈو کے کان کے نیچے ہلکی سی خراش آئی اور بس ۔ فون پر بریگیڈیئر باسط نے مجھے اس واقعے کی جو تفصیلات بتائیں وہ جادو نگری کی کسی کہانی سے مختلف نہیں ہیں۔ سڑک پر بیٹھے ہوئے حملہ آور کو انھوں نے پہلے سے دیکھ لیا تھا ۔ لیکن وہ چونکہ موڑ کے پاس موجود تھا لہذا گاڑی کو روکنا ممکن نہیں تھا ، انھوں نے حملہ آور کو اپنی آنکھوں کے سامنے پھٹتے ہوئے دیکھا مگر نہ کوئی چَھرا لگا اور نہ ہی بم کاٹکڑا ۔ یہ کیسے ہو سکتا ہے کہ اتنا بڑا حملہ اتنے قریب سے ہوا ہو اور کوئی نقصان نہ ہو۔ مگر ایسا ہی ہوا ۔ بریگیڈیئر باسط کا کہنا تھا کہ ان کو ایسا محسوس ہوا کہ جیسے ایک نہ نظر آنے والی دیوار ان کے اور حملہ آور کے درمیان آ گئی ہو ۔ دھماکا دیکھا بھی اور سنا بھی مگر صاف بچ گئے ۔ ان کے مطابق خدا کے گھر دو ماہ پہلے دی ہوئی حاضری اور ماں باپ کی دعائیں اس مشکل وقت میں ان کے کام آ گئیں۔اس میں کوئی شک نہیں دعائیں اور عبادات بڑے امتحان ٹال دیتی ہیں ۔ نیکی کی کثرت مشکل میں ڈھال بن جاتی ہے ۔

رینجرز کے کراچی میں آپریشن پر رپورٹنگ کے لیے میری ملاقات کئی مرتبہ بریگیڈیئر باسط سے ہوئی ۔ ان کی کام پر مکمل توجہ دینے کی عادت کافی متاثر کن ہے ۔ ہر وقت اپنی یونیفارم کی ساکھ کی فکر رکھنے والے بریگیڈیئر باسط طبیعتاً انتہائی خوش مزاج اور مختلف موضوعات پر گرفت رکھنے والے ہیں ۔ یقیناً پاکستان کے ہر شعبے میں ان جیسے اوصاف رکھنے والے کم نہیں ہیں۔ اگرچہ دوسرے اچھے لوگوں کی طرح یہ سامنے نہیں آتے ۔ محب وطن پاکستانیوں کی موجودگی میں ہماری حالت اتنی ابتر کیوں ہو گئی ہے ۔ اس حقیقت میں چھپی ہوئی حکمت میری ناقص سمجھ سے باہر ہے ۔ بر یگیڈیئر باسط کے توسط سے ڈی جی رینجرز جنرل رضوان سے بھی کراچی میں کئی مرتبہ ملاقات ہوئی ، میں یہ کہہ سکتا ہوں کہ اپنے کام کو کرنے کے لیے جس قسم کی ٹیم کی ضرورت ہر کمانڈر کو ہوتی ہے وہ جنرل رضوان کے پاس موجود ہے۔

اسی طرح اگر کسی ٹیم کو کامیاب ہونے کے لیے اچھے کپتان کی ضرورت ہوتی ہے تو وہ کراچی رینجرز کو دستیاب ہے ۔ اگر پرسوں کے حملے میں کوئی نقصان ہو جاتا تو یقیناً اس کے اثرات کراچی کے حالات پر منفی اور انتہائی دور رس ہوتے۔ رینجرز پر یہ نشانہ پہلی مرتبہ نہیں لگایا گیا ۔ جس روز وزیر اعظم نواز شریف اسمبلی میں اپنی امن اور دوستی تقریر فرما رہے تھے اس روز رینجرز پر ایک اور خود کش حملے میں تین اہلکار شہید ہو گئے تھے ۔ ایک اطلاع کے مطابق جنرل رضوان حملے کی جگہ سے اپنے ساتھیوں سمیت کچھ دیر پہلے ہی گزرے تھے۔کراچی رینجرز کے افسران اور جوان حیرت انگیز اور کرشماتی انداز میں ان حملوں کے بدترین اثرات سے تو بچ گئے مگر بدقسمتی سے پولیس کمانڈوز میں سے بہت سے خوش قسمت ثابت نہ ہوئے ۔

جمعرات کو ہونے والے ایک اور واقعے میں سندھ پولیس کے تیرہ کمانڈوز شہید ہو گئے ۔ حملہ ظاہراً ریموٹ کنٹرول کے ذریعے کیا گیا تھا ۔ تفصیلات کے مطابق خاص تربیت یافتہ گروپ کے یہ پولیس کمانڈوز جن کی تعداد 70 کے قریب تھی حسب طریقہ اہم شخصیات کی حفاظت پر متعین کیے جانے کے بعد بس میں بیٹھ کر سفر کا آغاز کرنے ہی والے تھے کہ یکدم دھماکا ہو گیا ۔ دھماکے کی براہ راست زد میں آنے والوں کا کچھ نہیں بچا ۔ جسموں کے پرخچے اڑ گئے ۔ نسبتا پیچھے والوں کو شدید زخم آئے ۔ ان میں سے کئی ہمیشہ کے لیے معذور ہو گئے ہیں ۔ کم زخمی بھی کوئی اتنے کم زخمی نہیں ہیں ۔ کسی کے کان کٹ گئے ہیں ، کسی کی آنکھ اڑ گئی ہے ، کسی کے ہاتھوں کی انگلیاں چلی گئی ہیں ، کسی کے جسم پر چمڑا جل جانے کی وجہ سے گہرے داغ پڑ گئے ہیں۔ بہرحال اس واقعے میں بھی خدا وند تعالی نے کرم کیا ۔ مزید جانی نقصان ہو سکتا تھا جو نہ ہوا۔جب محدود جگہ پر ایسا دھماکا ہوتا ہے تو اس کے کافی بھیانک نتائج نکلتے ہیں۔ 13 کی جگہ شہادتیں تیس بھی ہو سکتی تھیں۔ پولیس والوں کو خداوند تعالی کا شکر ادا کرنا چاہیے اور سندھ حکومت کی تعریف کرنی چاہیے کہ اس نے فوری مالی مدد کا اعلان کر کے ان کا نقصان پورا کر دیا۔ منتخب حکومت ہو تو ایسی۔ جان تو آنی جانی چیز ہے اصل معاملہ مالی مدد کا ہے جو سندھ حکومت نے فوری طور پر طے کر دیا ۔

اس واقعے سے ایک دن پہلے پشاور کے ایک گائوں میں امن لشکر کے ممبران جو تقریبا ایک ہی خاندان سے تعلق رکھتے تھے ،شہید کر دیے گئے ۔ بوقت فجر ان کے گھر پر حملے کے بعد عورتوں اور بچوں کو ایک کمرے میں بند کر کے مردوں کو کھیتوں میں لے جا کر گولیوں سے اڑا دیا گیا۔اخبار میں چھپی ہوئی ایک خبر کے مطابق نو سال کی ایک بچی کو اپنے والد کے قتل سمیت یہ تمام مناظر دکھائے گئے تاکہ وہ واپس جا کر سب کو بتا پائے کہ کیا ہوا تھا ۔ دوسرے واقعات کی بھرمار میں اس گائوں کی کہانی چھپ گئی ہے ۔ ہمیں علم نہیں ہے کہ متاثرہ خاندان کی خواتین کا کیا حال ہوا ہو گا ۔ بچے کس حالت میں ہوں گے ، میرا خیال ہے کہ عمران خان کی جاری کی ہوئی پریس ریلیز نے عورتوں اور بچوں کے زخم بہت حد تک مندمل کر دیے ہوں گے ۔ عظیم قائد نے واقعے کی مذمت کرتے ہوئے اسے بات چیت کے عمل کے خلاف سازش بھی قرار دیا ۔ مجھ پر یہ واضح نہیں ہے کہ وہ مذمت واقعے کی کر رہے ہیں یا سازش کی ۔جو بھی کہا ہو گا ٹھیک کہا ہو گا عمران خان ہیں وہ غلط کیسے ہو سکتے ہیں ؟وزیر اعظم نواز شریف کی طرح جو ان تمام واقعات کے دوران غیر حاضر تھے ۔ مگر بین الاقوامی سفارت کاری کے ذریعے پاکستان کے تحفظ کے لیے جانفشانی سے کام بھی کر رہے تھے ۔ ظاہر ہے ترکی، افغانستان اور پاکستان کو اکٹھا کرنا روز مرہ کے واقعات سے کہیں زیادہ اہم ہے۔ اتنا ہی اہم جتنا کہ کرکٹ بورڈ کے مسائل کے حل کے لیے نجم سیٹھی جیسی ہردلعزیز شخصیت کی تعیناتی ہے۔ اسی قسم کے اقدامات کے ذریعے امن حاصل کر لیا جائے گا ۔ ہمیں ان واقعات سے پریشان ہونے کی ضرورت نہیں ۔ زندگی آنی جانی ہے ۔ بریگیڈیئر باسط اور درجنوں کمانڈوز بچ گئے ہیں ۔ یہ ملک بھی بچ جائے گا۔ امن قائم ہو گا ۔ گھبرائیں مت ۔

طلعت حسین